Maoslen
From Wikipedia, the free encyclopedia
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
De Maoslen of de Maoslande is ei cultureel gebeed in de Neêrlen. 't Gebeed, wie de naom al deit vermuije, ligk aon de overs vaan de Maos. Graovegwegk bevat 't gebeed de provincies Name, Luuk en Nederlands en Belsj Limburg (meh ouch Aoke kin me op zekere zin mètrekene). 't Gebeed kin me indeile in twie gebejer, naomelek ei Zuudneêrfrankisch gebeed (boe me Limburgs kalt) en ei Waols gebeed. Ouch al heet 't gebeed noets ein echte bestuurleke einheid gevurmp, op cultureel gebeed kinne de Maoslen toch ein bepaolde univörmiteit. Regionaole stijle wie de Maoslandse kuns (11e, 12e en 13e iew), de Maosgotiek (13e, 14e en 15e iew), Maoslandse renaissance (16e en 17e iew) en de Maoslandse barok (17 en 18e iew) zien veurbeelder. De Maos vörmp allezeleve de bindende factor in 't gebeed.