Fiangonan' ny kônsily roa

Ny Fiangonan' ny kônsily roa dia ireo fiangonana kristiana manaraka ny Kônsily voalohany tao Nikea (taona 325) sy ny Kônsily voalohany tao Kônstantinôpôly (taona 381) sady mitsipaka ireo kônsily ekiomenika rehetra natao taorian' ireo. Nisaraka tamin' ny ankamaroan' ny fiangonana kristiana izy ireo taorian' ny kônsily fahatelo (Kônsily tao Efeso, taona 431).

Atao amin' ny anarana fanaratsiana hoe Fiangonana nestôriana koa ireo fiangonana ireo. Anisan' ny sampan' ny fiangonana kristiana tatsinanana izy ireo. Misy mpino vita batemy miisa 250 000 any ho any ireo fiangonana ireo.

Ireto avy izy ireo:

1. ny Fiangonana ôrtôdôksa asiriana (na Fiangonana apôstôlika asirianan' ny Atsinanana, anisan' izany ny Fiangonana siriana kaldeana na Fiangonana malabara ôrtôdôksa;
2. ny Fiangonana Tranain' ny Atsinanana.

Tsy mba mandeha manao asa misiôna ny Fiangonan' ny kônsily roa sady iharan' ny fanenjehana ny mpino ao aminy ao amin' ireo firenena misy azy ka mahatonga ity sampan' ny fiangonana kristiana ity ho eo an-dalam-panjavonana.

Ny kônsily telo

Ny kônsily roa voalohany

Ny Kônsily voalohany tao Nikea

Ny Kônsily voalohany tao Nikea (na Nisea) dia natao tamin' ny taona 325 ka ny emperora Kônstantino no nampiantso azy. Io no kônsily voalohany. Izany dia natao mba handraiketana ny maha Andriamanitra an' i Jesoa Kristy ka hanoherana ny fampianaran' i Ariosy (ny arianisma) izay noheverina ho fampianaran-diso tamin' izay. Tapaka fa "mitovy fomba" (homoousia) amin' ny Ray ny Zanaka amin' ny maha Andriamanitra ny Ray sy ny Zanaka. Navoaka ny Fanekem-pinoana nikeana. Araka ny lovantsofina dia i Nikôlasy avy any Mira (izay fantatra amin' ny hoe Masindahy Nikôlà) sy i Spiridôna avy any Trimitônta dia nandray anjara betsaka tamin' io kônsily io.

Ny Kônsily voalohany tao Kônstantinôpôly

Nanamafisana ny zavatra tapaka tao amin' ny Kôsilin' i Nikea ny Kônsily voalohany tao Kônstantinôpôly (na Kônstantinôpla) izay nanalavana ny Fanekem-pinoana nikenana ka lasa Fanekem-pinoan'i Nikea sy Kônstantinôpôly. Io no konsily ekiomenika faharoa. Tapaka fa Andriamanitra koa ny Fanahy Masina. Nohamafisina ny maha Andriamanitra an' i Kristy sady nambara fa Andriamanitra koa ny Fanahy Masina ary noraiketina ilay fanekem-pinoana natao tamin' ny kônsily voalohany tao Nikea.

Ny kônsily fahatelo

Ny Kônsily tao Efesôsy

Ny kônsily fahatelo, dia ny Kônsily tao Efesôsy, dia nanapahana ny maha Renin' Andriamanitra an' i Maria renin' i Jesoa. Nivoaka noho izany ny Fiekem-pinoan' i Efezy. Nitsipahana ny nestôrianisma koa izany kônsily izany.

Nanambara ny maha tokana tsy mizara an' i Kristy hatrany am-bohoka ity kônsily ity. Nohelohiny ny fampianaran' i Nestôriôsy, patriarkan' i Kônstantinôpôly, izay nampianatra (mba tsy hampifangaroana ny olona atao hoe Jesoa sy ny Logos izay an' Andriamanitra) fa i Maria Virjiny dia tsy niteraka afa-tsy olombelona izay manana fifamatorana tsy azo foanana amin' ny Logos. I Nestôriôsy mantsy dia nampianatra fa miara-misy ireo natioran' i Kristy roa ireo nefa misaraka. Nitsipaka io fanapahan-kevitry ny kônsily io ireo Fiangonana nestôriana sady nisaraka tamin' ny Fiangonan' ny Empira.

Jereo koa

• Nestôrianisma
• Fiangonan' ny kônsily telo
• Fiangonan' ny kônsily fito