Krôma

Ny krôma dia singa simika manana ny eva simika Cr sy laharana atômika 24. Izy no singa voalohany ao amin' ny vondrona 6. Miloko volondavenona izy ary mamirapiratra. Ny krôma tsotra dia metaly tetezamita.

Krôma

Toetrany

Vaingana krôma

Misy betsaka eo amin' ny natiora ny krôma, izy no singa faha-21 be indrindra amin' ny harin-tany. Ny lanja atômikany dia 51,996, miempo manodidina ny 1 875 °C, mangotraka manodidina ny 2 670 °C ary manana hakitroka 7,2 izy.

Ny krôma dia afaka manolo amin’ ny ampahany ny viraty na ny vy amin' ny mineraly maro, ka manome loko miavaka azy ireo. Vatosoa maro no manana ny lokony miavaka noho ny fisian’ ny krôma ao aminy. Vitsy ny akoran-krôma azo trandrahina, ny krômita na vy misy krôma (FeCr 2O₄) no hany hita betsaka.

Fampiasana azy

Mihoatra ny 60 % amin' ny famokarana krôma dia natokana ho an' ny fanamnoarana vokatra metaly, ary eo amin' ny 20 % no ampiasaina amin' ny zavatra mahatanty hafanana be. Ny krôma dia fangaro ao amin' ny mpandrisikoto (frantsay: catalyseurs) manan-danja maro toy ny ôksida-na krôma (Cr₂O₃). Ny krôma koa dia ampiasaina indrindra amin' ny tsamam-piraka sy vy na nikela na kôbalta.

Ny fampidirana krôma dia mampitombo ny hamafy sy ny tanjaka ary ny fahatoheran’ ny tsama ny harafesina. Amin'ny tsy tsy mety harafesina, ny krôma dia mitana fara fahakeliny 10 % amin' ny fangaro. Noho ny hamafiny dia ampiasaina ny tsama avy amin’ny krôma sy kôbalta ary tongstena hanamboarana fitaovana fanapahana metaly haingam-piasa. Apetraka amin' ny alalan' ny fanahotoana ny krôma ka mamorona sosona mampifono mafy, mahatohitra ny harafesina sady mamirapiratra. Izany no mahatonga azy io hampiasaina betsaka ho toy ny sosona ivelany amin’ ny vatan’ ny fiarakodia. Ambony ny mari-panam-pitsonihany, antonony ny lanjan’ isan’ ny fiitarany ara-kafana, ary marin-toerana ny firafitra kristaliny, noho izany ny krômita dia matetika ampiasaina ho akora mahatanty hafanana ambony.