Midrasa

Ny Midrasa dia lahateny na lahatsoratra nataon' ny raby ivoasany ny Torah mba hanazavana ny zavatra momba ny lalàna na ny fitondran-tena. Amin' ny teny hebreo izany dia atao hoe מדרש / midrash. Ny tanjon' ny fanaovana midrasa dia ny hanazava ny hevi-dalina miafina ao ambadiky ny hevitra ara-bakitenin' ny Baiboly. Anangonana ny fivoasana nataon' ny raby maro ny amin' ny lalàna sy ny fomba amam-panao resahina ao amin' ny Soratra Masina ny Midrasa. Maro ny midrasa (midrashim) voasoratra ka naharitra taonjato folo no nanaovana izany. Natao am-bava aloha ny midrasa vao izay noraiketina an-tsoratra taty aoriana. Ny midrasa koa dia ny boky mirakitra izany fivoasana izany sy ny lahatsoratra mamelabelatra azy ireo ary ny fomba fiasa anatanterahana izany fivoasana izany.

Pejin-dohatenin' ny fanontana ny Midrash Tehillim (Praha, 1613).

Voasoratra tany amin' ny taona 200 tal. J.K. any ho any ny midrasa tranainy indrindra, ary tamin' ny taonjato faha-12 taor. J.K. ny farany indrindra.

Fiforonan-teny

Ny teny hoe midrasa dia avy amin' ny teny hebreo hoe מדרש / midrash, izay avy amin' ny hoe drsh, "manontany" na "manadihady".

Midrasa halakà sy Midrasa agadà

Misokajy roa ny midrasa, dia ny midrasa halakà (hebreoː מדרש הלכה / Midrash halakha) sy ny midrasa agadà (hebreoː מדרש אגדה / Midrash aggada). Mikasika ny lalàna sy manangona ny fitsipika (halakhot) izay mitambatra ao amin' ny Lalàna am-bava ny midrasa halakà.

Miankina amin' ny sehatra rehetra tsy momba ny lalàna (anisan' izany ny fomba amam-panao, ny fitondran-tena, ny teôlôjia, sns) sady manome fampianarana ara-pitondran-tena ny midrasa agadà. Ahitana agadà (אגדה) izay miseho amin' ny endrika sy fomba fandaharan-teny maro isan-karazany ny midrasa agadà: fanoharana, fitantarana, angano, sns.

Jereo koa

• Jodaisma
• Raby
• Talmoda
• Misnà