Анадолски јазици

Анадолски јазици — стари мртви индоевропски јазици кои се зборувале на територијата на Анадолија, денешна Турција. Денес не е познато многу за овие јазици, но има зачувано мал број записи и споменици од кои се црпат јазични тези.

Анадолски јазици
Народност:	Анадолци
Класификација:	индоевропски анадолски јазици
Прајазик:	Праанадолски јазик
Гранки:	Хетитски јазик Палајски јазик Лидиски јазик

Дрво на индоевропски јазици. Анадолските јазици се прикажани најгоре.

Теорија за местоположбата на анадолските јазици.

Најголемата територијална експанзија на Хетитското Царство под водство на Супилилиума I (1350–1322 п.н.е.) и Мурсили II (1321–1295 п.н.е.)

Географска местоположба на лувискиот јазик.

Потекло

Анадолската група јазици, најверојатно, е една од првите која се одделила од праиндоевропскиот јазик. Оваа фаза, првата фаза на делење на праиндоевропскиот, се именува или како „индо-хетитски“ или „средноиндоевропски“. Оваа развојна фаза на јазиците се датира од 4 милениум п.н.е. Според Кургановата хипотеза, има две теории за тоа како анадолските говорници стигнале до Анадолија: преку северниот правец од Кавказот и преку западниот правец преку Балканот. Според јазичарите како што се Малори, Стајнер и Ентони, теоријата за Балканот е поверојатна.^[1][2]

Исчезнување

По освојувањето на Анадолија од Александар Македонски, регионот потпаднал под силно хеленистичко влијание. Општото мнение на јазичарите е дека анадолските јазици исчезнале до 6 век. Така, анадолските јазици станале првата индоевропска јазична група што исчезнала. Денес се теоризира дека одреден број ерменски зборови имаат директно потекло од некој од анадолските јазици, најверојатно лувиски.

Слабо проучениот исаурски јазик, за кој се смета дека можеби е лувиски дијалект,^[3] изгледа е последниот анадолски јазик кој исчезнал. Епиграфските натписи, вклучително и надгробните натписи, датираат од 5 век.^[4]

Класификација

Класификацијата која тука е дадена следи груб систем на поделба на оваа јазична група зададен од Роберт Бикс (2010).^[5] Овој модел има само една јасно зададена подгрупа, а таа е лувиската.

• Хетитски јазик †
• Палајски јазик †
• Лувиски јазици
  • Лувиски јазик †
  • Ликиски јазик †
  • Милиски јазик †
  • Кариски јазик †
  • Сидетиски јазик †
  • Писидиски јазик †
• Лидиски јазик †

Симбол: † - мртви јазици.

Во оваа јазична група можеби имало и други јазици кои не оставиле пишани докази. Така на пример, помеѓу јазичарите, има верување дека ликаонскиот и исаурскиот, но и јазиците како што се памфилиски и лутескански (мизиски) се дел од анадолските јазици, но сепак нема докази за да се разработаат.