Брза железница

Брза железница (англиски: High-speed rail, HSR) — вид железничка превозна мрежа што користи возови што се движат значително побрзо од традиционалните, користејќи вграден систем од специјализиран железнички возен парк и посветени пруги. Иако не постои единствена определба или стандард што се применува насекаде низ светот, линиите изградени за брзини од најмалку 250 км/ч или надградените линии со брзина од најмалку 200 км/ч обично се сметаат за брзи.^[1][2][3]

Брзи возови на Кинеската железница на железничката станица Пекинг Чаојанг; Кина ја има најразвиената мрежа на брзи железници во светот.

Македонија има планови за воведување на брзи возови.^[4]

Брзите возови најчесто сообраќаат на пруги со стандарден колосек со непрекинато заварени шини, на посебни траси без вкрстувања на исто ниво и со големи полупречници на кривините. Меѓутоа, одредени региони со пошироки постоечки пруги, вклучувајќи ги Русија и Узбекистан, се обиделе да развијат мрежа на брза железница со руски колосек. Не постојат брзи железници со тесен колосек. Земјите чија постоечка мрежа е целосно или претежно со различен колосек од 1435 мм — вклучувајќи ги Јапонија и Шпанија — честопати избирале да ги градат своите брзи линии со стандарден колосек наместо со постоечкиот.