Галатеја (месечина)

Галатеја (или Нептун VI) — четврта по близина внатрешна месечина на Нептун. Наречена е по Галатеја, една од Нереидите од старогрчката леганда во која напусто бил заљубен киклопот Полифем.

Галатеја

Галатеја гледана од „Војаџер 2“
Откривање
Откривач	Стивен Синот[1] и екипата за слики на „Војаџер“
Откриено	јули 1989
Ознаки
Наречена по	Галатеја
Орбитални особености[2][3]
Епоха 18 август 1989
Голема полуоска	61 952.57  км
Занесеност	0,00022 ± 0,00008
Орбитален период	0,42874431 ± 0,00000001 д
Наклон	0,052 ± 0,011° (кон Нептуновиот екватор) 0,06° (кон месната Лапласова рамнина)
Месечина на	Нептун
Физички особености
Димензии	204×184×144 км (±~10 км)[4][5]
Среден полупречник	87,4 ± 4,9 км[3]
Зафатнина	~2,8×106км³
Маса	2,12 ± 0,08 ×1018 кг[6]
Средна густина	~0,75 г/см³ (проц.)[7]
Површинска гравитација	~&100000000000000180000000,018 м/с2[а 1]
Втора космичка брзина	~0.056 км/с[а 2]
Вртежен период	синхроно
Осен наклон	нула
Албедо	0,08[4][7]
Температура	~51 K (средна проц.)
Привидна величина	21,9[7]

Откривање

Галатеја во бледиот прстенов лак близу Нептун.

Месечината е откриена кон крајот на јули 1989 г. според сликите направени од сондата „Војаџер 2“ и ја добила привремената ознака S/1989 N 4.^[8] Откритието е објавено на 2 август истата година, а трајното име го добила на 16 септември 1991 г.^[9]

Физички својства

Галатеја има неправилен облик и нема знаци на каква било геолошка изменетост. Веројатно е дека се работи за збировит отпад составен од парчиња од првобитните Нептунови месечини, кои се судриле поради растројувања од месечината Тритон наскоро по нејзиниот зфат во многу занесена првична орбита.^[10]

Орбита

Орбитата на Галатеја лежи под полупречникот на Нептуновата синхрона орбита, така што таа бавно се врти навнатре под дејство на плимно забавување, и со време може да се судри со планетата или да се распарчи во нов планетарен прстен откако ќе ја премине својата Рошова граница под дејство на плимно растегнување.

Галатеја е пастирска месечина за Адамсовиот прстен кој е 1.000 км вон својата орбита. Резонанциите со Галатеја се во сооднос 42:43 и се сметаат за најверојатниот механизам со кој се заробени уникатните лакови кои постојат во прстенот.^[11] Нејзината маса е проценета врз основа на радијалните растројувања кои ги предизвикува во прстенот.^[6]

Белешки

1. Површинската гравитација изведена од масата m, гравитациската константа G и полупречникот r: Gm/r².
2. Втората космичка брзина изведена од масата m, гравитациската константа G и полупречникот r: √2Gm/r.

Бидејќи Галатеја има неправилен облик, вистинската површинска гравитација и втора космичка брзина значително се разликуваат од едно место до друго.