Дија

Дија (чешки: Dyje) или Таја (германски: Thaya) — река во Средна Европа, најдолга десна притока на Морава. Долга е вкупно 224 км,^[1] протегајќи се од запад кон исток на пограничното подрачје помеѓу Долна Австрија и Јужна Моравија (Чешка), иако границата на највеќето места не минува по самата река. Настанува од две помали реки, наречени Германска Дија (Deutsche Thaya) и Моравска Дија (Moravská Dyje, Mährische Thaya) кои потоа се среќаваат кај гратчето Рабс.

Дија
Дија во Бжецлав, Моравија
Изворно име	Dyje, Thaya
Местоположба
Земји	Чешка,  Австрија
Физички особености
Извор
• место	кај Паненска Росичка
• надм. вис.	410 м
Устие
• место	Морава
• координати	48.6170°N 16.9402°E / 48.6170; 16.9402
• надм. вис.	148 м
Должина	224 км [1]
Големина на сливот	13 419 км2
Проток
• просечен	43,9 м3/с
Особености на сливот
Течение	Морава→ Дунав→ Црно Море

Името Дија значи „тромава“. Недалеку од Знојмо се наоѓа истоименото селце Дије, наречено по реката.

Географија

Во горното течение, реката минува низ длабоки клисури во Националниот парк Подији и минува покрај повеќе замоци и дворци. Тука има изградено неколку брани.

Дија ги собира водите од западната половина на Моравија и соседните краишта на Долна Австрија. Нејзини најголеми притоки се Свратка и Јихлава кои се среќаваат во средната акумулација од хидросистемот „Нове Млини“.

Населени места

Поважни населени места по течението на Дија (по низводен редослед) се:

• Рабс на Дија (Raabs an der Thaya)
• Дрозендорф-Цисерсдорф (Drosendorf-Zissersdorf)
• Вранов на Дија (Vranov nad Dyji)
• Хардег (Hardegg)
• Знојмо (Znojmo)
• Ла на Дија (Laa an der Thaya)
• Леднице (Lednice)
• Бжецлав (Břeclav)

Брани

Акумулацијата „Знојмо“.

Сите брани на Дија се наоѓаат во Чешка и служат за наводнување, производство на електрична енергија и заштита од поплави.

Брана	Моќност	Вид
„Вранов“	18,9 MW	обична
„Знојмо“	1,4 MW	проточна
„Нове Млини I“ (горна)	—	проточна
„Нове Млини II“ (средна)	—	проточна
„Нове Млини III“ (долна)	2,4 MW	проточна

Поврзано

• Германска Дија
• Моравска Дија