Метох

Метох (множина: метоси) (грчки: μετόχιον или μετόχι) – манастирска земја, манастирски имот^[1], односно недвижен имот во сопственост на манастир. Се состои од религиозни и стопански објекти, како и објекти за живеење. Вообичаено се наоѓа во населено место и во него живеат и за него се грижат монаси и монахињи. Во него се изведуваат богослужби, се примаат исповедници, се организираат поклоненија.

Манастирот „Св. Ѓорѓи Победоносец“, метох на Бигорскиот манастир

Во текот на османлиското владеење, метосите, како и црквите и манастирите, биле центри на православната духовна култура, нејзино опстојување и зачувување на македонскиот идентитет. Во нив често постојат ќелијни училишта кои ја поддржуваат основната писменост.

Метоси во Македонија

Попознати метоси во Македонија:

• Манастир „Св. Ѓорѓи Победоносец“ - Рајчица, метох на Бигорскиот манастир
• Црква „Св. Ахил Лариски“ - Требиште, метох на Бигорскиот манастир
• Црква „Собор на Светиот Архангел Гаврил“ — главна црква на Џепишкиот манастир, метох на Бигорскиот манастир;^[2][3]
• Црква „Св. Петка“ – Љубаништа, метох на манастирот Свети Наум
• Манастир „Св. Спиридон Чудотворец“-Злетово, метох на Лесновскиот манастир^[4]