Нетјеркаре Сиптах

Нетјеркаре Сиптах (исто така Неитикерти Сиптах и можеби легендарната фигура Нитокрис) бил антички египетски фараон, седмиот и последен владетел на Шестата династија. Сепак, некои научници го класифицираат како прв крал на Седмата или Осмата династија.^[2] Како последен крал на 6-та династија, Нетјеркаре Сиптах според некои египтолози е последниот крал од периодот на Старото кралство.

Netjerkare Siptah
Неитикерти Сиптах, Нитокрис, Сиптах I, Нетјеркаре
Картуш на Нетјеркаре во Кралски список од Абидос.
Фараон на Египет
Владеел	околу 3 години, 2184–2181 п.н.е.[1], 6-та династија или 8-ма династија
Претходник	Меренре Немтиемсаф II
Наследник	Менкаре (Осма династија)
Владетелски звања Предиме: Кралски список од Абидос Нетјеркаре Nṯr-k3-Rˁ Божествен е Ка на Ра Име: Торински канон Неитикерти Сиптах Nt-iḳrti s3-ptḥ Неит е одличен, син на Птах

Нетјеркаре Сиптах кратко владеел на почетокот на 22 век п.н.е., во време кога моќта на фараонот се распаѓала, а на локалните номарси се зголемувала. Иако бил маж, Нетјеркаре Сиптах е најверојатно иста личност со женскиот владетел Нитокрис споменат од Херодот и Манетон.^[3]

Потврди

Името Нетјеркаре е испишано на 40-тиот влез од Кралскиот список од Абидос, кралски список изработен за време на владеењето на Сети I. Нетјеркаре е веднаш по Меренре Немтиемсаф II на списокот.^[2] Нетјеркаре е потврден и на една бакарна алатка со непознато потекло, што сега се чува во Британскиот музеј.^[4] Името Неитикерти Сиптах е испишано на Кралскиот список од Торино, во 5-та колона, 7-ми ред (4-та колона, 7-ми ред во реконструкцијата на списокот од страна на Гардинер).

Идентификација со Нитокрис

Во своите „Истории“, грчкиот историчар Херодот наведува легенда според која египетската кралица Нитокрис се одмаздила за убиството на нејзиниот брат и сопруг од толпа при немири. Таа го пренасочила Нил за да ги удави сите убијци за време на банкетот каде што биле собрани.^[2] Оваа приказна е исто така спомената од египетскиот свештеник Манетон, кој напишал историја на Египет наречена Египтијака во 3 век п.н.е. Манетон пишува за Нитокрис дека таа била „... похрабра од сите мажи на своето време, најубава од сите жени, со светла кожа со црвени образи“. Манетон ѝ ја припишува изградбата на Пирамидата на Менкауре.^[5] Иако убиениот крал не е именуван од страна на Херодот, Нитокрис следи веднаш по Меренре Немтиемсаф II кај Манетонн. Бидејќи кралот што го следи Меренре Немтиемсаф II во кралскиот список од Абидос е „Нетјеркаре“, германскиот египтолог Лудвиг Штерн во 1883 година предложил дека Нетјеркаре и Нитокрис се иста личност.^[3][6]