Папа Формоз

Формоз (лат. Formosus PP.; околу 816 - 4 април 896) — римски папа од 6 октомври 891 до 4 април 896^[1]. Во време на папата Никола I станал епископ на Порто. Негова соновна задача била да го избави папскиот престол од Гвидонидите.

Formosus
Ракоположен	6 октомври 891
Службата завршила	4 април 896
Претходник	Папа Стефан V
Наследник	Папа Бонифациј VI
Лични податоци
Световно име	Формоз
Роден	околу 816 Остиа, Италија
Починал	4 април 896 Рим
Други папи наречени Формоз

Ран живот и црковна кариера

Формоз најверојатно бил роден околу 816 година во Остија, дел од Папската Држава, и се смета дека бил Римјанин по потекло. Малку се знае за неговото рано детство, но неговата интелигенција и способност за дипломатија го направиле истакнат во црковните кругови. Во 864 година, за време на понтификатот на папа Никола I, Формоз бил назначен за кардинал-епископ на Порто, една од седумте предгратски епархии на Рим.

Формоз се истакнал како способен дипломат. Во 866 година, папа Никола I го испратил како легат во Бугарија, каде што имал задача да го поддржи покрстувањето на Бугарите. Таму се сретнал со кнез Борис I, кој бил толку импресиониран од неговата ерудиција и духовност што побарал од папата да го назначи Формоз за архиепископ на Бугарија. Сепак, Никола I одбил, повикувајќи се на црковните канони кои забранувале епископ да ја напушти својата епархија за да преземе друга. Подоцна, во 869 и 872 година, Формоз бил испратен на дипломатски мисии во Франција, каде што успеал да го убеди кралот Карло Ќелавиот да биде крунисан од папата во 875 година.