Трент Резнор

Мајкл Трент Резнор (англ. Michael Trent Reznor; роден на 17 мај 1965) ― американски музичар, пејач, текстописец, музички продуцент и композитор. Тој е пејач и главен текстописец на рок-групата Nine Inch Nails,^[1][2][3] која ја основал во 1988 година и во која до 2016 година бил нејзин единствен официјален член.^{[б 1]} Првиот албум на Nine Inch Nails, Pretty Hate Machine (1989), забележал успех кај критиката и кај публиката. Потоа Резнор и Nine Inch Nails објавиле уште 11 студиски албуми.

Трент Резнор
Трент Резнор во февруари 2008
Роден(а)	Мајкл Трент Резнор 17 мај 1965(1965-05-17) (60 г.) Њукасл, Пенсилванија, САД
Занимање	Музичар пејач текстописец музички продуцент композитор
Активен период	1982–денес Музичка кариера
Жанрови	Индустриски рок индустриски метал алтернативен рок пост-индустриска музика синт-поп електронска музика филмска музика
Инструменти	Vocals guitar keyboards
Издавачи	The Null Corporation Columbia Nothing Interscope Universal TVT
Сопружник	Марикин Мандиг  (в. 2009)
Деца	5
Страница nin.com

Резнор музичката кариера ја започнал во средината на 1980-тите како член на синт-поп групи.^[3] Тој придонел за албумите на музичари како Мерилин Менсон, на која ѝ бил ментор, раперот Саул Вилијамс и Холзи. Во 2009 година, заедно со неговата сопруга Марикин Мандиг и долгогодишните соработници од Nine Inch Nails Атикус Рос и Роб Шеридан, тој ја основал групата How to Destroy Angels.^[4][5]

Од 2010 година, Резнор, заедно со Атикус Рос, почнал да работи на филмски и телевизиски партитури. Двајцата создале филмска музика за повеќето филмови од Дејвид Финчер, како: „Социјална мрежа“ (2010), „Девојката со тетоважа на змеј“ (2011), „Исчезната“ (2014), „Манк“ (2020) и „Убиец“ (2023). Тие добиле Оскар за најдобра оригинална музика и Греми награда за најдобра музика за визуелни медиуми за филмовите: The Social Network (2010) и Душа (2020). Тие компонирале музика и за филмовите: Ден на патриотите (2016), Mid90s, Bird Box (двата од 2018), Waves (2019), Bones and All, Empire of Light (двата од 2022), Teenage Mutant Ninja Turtles: Mutant Mayhem (2023) и Предизвикувачи (2024). Напишале музика за документарците Пред поплавата (2016) и Војната во Виетнам (2017) и ТВ-серијата Watchmen (2019) за кој освоиле Еми-награда за серија во ударен термин.

Живот и кариера

Мајкл Трент Резнор^[6] е роден на 17 мај 1965 година,^[7] во Њукасл, Пенсилванија.^[8] Има германско и ирско потекло, а детството го поминал во Мерсер, Пенсилванија.^[8] Неговите родители се развеле кога тој имал шест години и тој почнал да живее кај баба му и дедо му по мајка. Почнал да свири пијано на 12-годишна возраст и покажал талент за музика.^[9]

Во средно училиште научил да свири на тенор-саксофон и на туба, и бил член и на џез-група и на марширачки бенд. Во средно училиште се занимавал и со глума. Матурирал во 1983 година и се запишал на колеџот во Медвил каде студирал компјутерско инженерство.

Почетоци на кариерата

Додека бил во средно училиште, Резнор станал член на групата Option 30 и со неа одржувал три концерти неделно. По една година се испишал од колеџ и се преселил во Кливленд за да започне музичка кариера.^[9] Во Кливленд работел во неколку музчки студија^[10] и бил член на неколку групи (како: Urge,^[11][12] The Innocent, Exotic Birds,^[13] Slam Bamboo^[14] и Lucky Pierre^[15][16]).

Nine Inch Nails

Главна статија: Nine Inch Nails

Резнор настапува на фестивалот Лолапалуза во 1991 година

Додека ги составувал првите песни од Nine Inch Nails, Резнор не можел да најде група која ќе може да ги изведе неговите песни како што тој сакал. Затоа, инспириран од Принс, свирел на сите инструменти (не чукал само на тапани). На ваков начин ги снимил повеќето студиски записи од Nine Inch Nails, иако повремено ангажирал други музичари, асистенти, тапанари и експерти за ритам. Неколку издавачки куќи позитивно реагирале на демо-материјалот, а Резнор потпишал со TVT Records.^[10]

Pretty Hate Machine бил издаден во 1989 година и релативно добро се продавал.^[17] Поради притисокот од неговата издавачка куќа да издаде продолжение на Pretty Hate Machine, Резнор тајно почнал да снима под различни псевдоними и како резултат на тоа го објавил мини-албумот под наслов Broken (1992). Nine Inch Nails во 1993 година освоила Греми-награда за „Најдобра хеви-метал изведба“ за песната „Wish“.^[18]

Вториот албум од Nine Inch Nails, The Downward Spiral, во 1994 година дебитирал на второ место на Billboard 200,^[19] и до денес е најпродавано издание од Nine Inch Nails во Америка.^[17]

Во 1999 година бил објавен двојниот албум The Fragile, а шест години подоцна бил објавен и следниот албум од Nine Inch Nails насловен како With Teeth. Резнор во меѓувреме бил на рехабилитација поради зависност од дрога. Резнор го издал концептниот албум Year Zero (2007) по што се разделил од големите издавачки куќи и независно за неговата сопствена издавачка куќа, The Null Corporation, издал два албума: Ghosts I–IV и The Slip. Во 2013 година Nine Inch Nails потпишала договор со Columbia Records и бил објавен албумот Hesitation Marks.

Атикус Рос, чест соработник на Резнор од 2002 година, бил прогласен за официјален член на Nine Inch Nails во 2016 година. Новиот состав на Nine Inch Nails од 2016 до 2018 година објавил трилогија EP: Not the Actual Events (2016), Add Violence (2017) и Bad Witch (2018).

How to Destroy Angels

Во април 2010 година, било објавено дека Резнор основал нова група наречена How to Destroy Angels, во која покрај него членувале неговата сопруга Марикин Мандиг и Атикус Рос. Групата, на 1 јуни 2010 година, дигитално издала едно истоимено ЕР со шест песни.^[20] Тие ја преработиле песната од Брајан Фери "Is Your Love Strong Enough?" ^[21] за саундтракот за филмот Девојката со тетоважа на змеј, објавен на 9 декември 2011 година.