ക്യാമറ ലെൻസ്
From Wikipedia, the free encyclopedia
ഒരു ക്യാമറയിൽ ചിത്രങ്ങൾ പകർത്താൻ സഹായിക്കുന്ന ഒപ്റ്റിക്കൽ ലെൻസ് അല്ലെങ്കിൽ ലെൻസുകളുടെ കൂട്ടം ആണ് ക്യാമറ ലെൻസ് എന്ന് അറിയപ്പെടുന്നത്. ഇവ ഫോട്ടോഗ്രാഫിക് ലെൻസ് അല്ലെങ്കിൽ ഫോട്ടോഗ്രാഫിക് ഒബ്ജക്റ്റ് എന്നും അറിയപ്പെടുന്നു.
ലെൻസ് എന്ന വാക്കാൽ വിവക്ഷിക്കാവുന്ന ഒന്നിലധികം കാര്യങ്ങളുണ്ട്. അവയെക്കുറിച്ചറിയാൻ ലെൻസ് (വിവക്ഷകൾ) എന്ന താൾ കാണുക. |
സ്റ്റിൽ ക്യാമറ, വീഡിയോ ക്യാമറ, ദൂരദർശിനി, മൈക്രോസ്കോപ്പ് അല്ലെങ്കിൽ അതുപോലുള്ള മറ്റ് ഉപകരണങ്ങൾ എന്നിവയിൽ ഉപയോഗിക്കുന്ന ലെൻസുകൾ തമ്മിൽ തത്വത്തിൽ വലിയ വ്യത്യാസമില്ല, എന്നാൽ ഓരോ ഉപകരണത്തിലെയും ലെൻസുകളുടെ രൂപകൽപ്പനയുടെയും നിർമ്മാണത്തിന്റെയും വിശദാംശങ്ങൾ വ്യത്യസ്തമാണ്. ഒരു ലെൻസ് ഒരു ക്യാമറയിലേക്ക് ശാശ്വതമായി ഉറപ്പിച്ചതാവാം, അല്ലെങ്കിൽ വ്യത്യസ്ത ഫോക്കൽ ലെങ്ത്, അപ്പർച്ചറുകൾ, മറ്റ് പ്രത്യേകതകൾ എന്നിവയ്ക്കനുസരിച്ച് ലെൻസുകൾ മാറ്റാവുന്നതാകാം.
നിരവധി ഒപ്റ്റിക്കൽ ലെൻസ് ഘടകങ്ങൾ അടങ്ങിയ ഒരു കോമ്പൗണ്ട് ലെൻസിൽ, ലെൻസുകൾക്ക് ഉണ്ടാകുന്ന വിവിധ ഒപ്റ്റിക്കൽ വ്യതിയാനങ്ങൾ ശരിയാക്കാൻ കഴിയുന്ന തരത്തിൽ ആവണം ലെൻസ് ഡിസൈൻ. എന്നാലും ലെൻസ് സിസ്റ്റത്തിൽ ചില അബറേഷനുകൾ അവശേഷിക്കും. ഇവ സമതുലിതമാക്കുകയും, ഫോട്ടോഗ്രാഫിക് ഉപയോഗത്തിനും ഒരുപക്ഷേ വൻതോതിലുള്ള ഉൽപാദനത്തിനും അനുയോജ്യമായ ഒരു ഡിസൈൻ നിർമ്മിക്കുകയും ചെയ്യുന്നത് ലെൻസ് ഡിസൈനറുടെ ജോലിയാണ്.