മൈക്കൽ കർട്ടിസ്
From Wikipedia, the free encyclopedia
മൈക്കൽ കർട്ടിസ് (ജീവിതകാലം: ഡിസംബർ 24, 1886 - ഏപ്രിൽ 10, 1962) ചരിത്രത്തിലെ ഏറ്റവും മികച്ച സംവിധായകരിൽ ഒരാളായി അംഗീകരിക്കപ്പെട്ട ഒരു ഹംഗേറിയൻ-അമേരിക്കൻ ചലച്ചിത്ര സംവിധായകനായിരുന്നു. സ്റ്റുഡിയോ സംവിധാനം പ്രബലമായിരുന്ന ഹോളിവുഡിന്റെ സുവർണ്ണ കാലഘട്ടത്തിൽ നിശബ്ദ കാലഘട്ടത്തിലെ ക്ലാസിക് സിനിമകളും മറ്റ് നിരവധി ചിത്രങ്ങളും അദ്ദേഹം സംവിധാനം ചെയ്തു.
1926-ൽ 39 വയസ്സുള്ളപ്പോൾ വാർണർ ബ്രദേഴ്സ് ഹോളിവുഡിലേക്ക് ക്ഷണിക്കുന്ന കാലത്ത് കർട്ടിസ് യൂറോപ്പിലെ അറിയപ്പെടുന്ന ഒരു സംവിധായകനായിരുന്നു. യൂറോപ്പിൽ ഇതിനകം 64 സിനിമകൾ സംവിധാനം ചെയ്തിട്ടുള്ള അദ്ദേഹം താമസിയാതെ വാർണർ ബ്രദേഴ്സിനെ അതിവേഗം വളരുന്ന ഒരു സിനിമാ സ്റ്റുഡിയോയാക്കാൻ സഹായിച്ചു. തന്റെ ഹോളിവുഡ് കരിയറിൽ കൂടുതലും വാർണേഴ്സുമായുള്ള സഹകരണത്തിൽ 102 ചിത്രങ്ങൾ സംവിധാനം ചെയ്ത കർട്ടിസ് പത്ത് അഭിനേതാക്കളെ ഓസ്കാർ നോമിനേഷനിലേക്ക് എത്തിച്ചു. ജെയിംസ് കാഗ്നിയും ജോവാൻ ക്രോഫോർഡും കർട്ടിസിന്റെ സംവിധാനത്തിലാണ് തങ്ങളുടെ ഏക അക്കാദമി അവാർഡുകൾ നേടിയത്. അദ്ദേഹം ആദ്യമായി ഡോറിസ് ഡേ, ജോൺ ഗാർഫീൽഡ് എന്നിവരെ വെള്ളിത്തിരയിൽ പരിചയപ്പെടുത്തിയ അദ്ദേഹം എറോൾ ഫ്ലിൻ, ഒലിവിയ ഡി ഹാവിലാൻഡ്, ബെറ്റി ഡേവിസ് എന്നിവരെ ഹോളിവുഡിലെ താരങ്ങളാക്കി. അഞ്ച് തവണ അക്കാദമി അവാർഡ് നാമനിർദ്ദേശം ചെയ്യപ്പെട്ട അദ്ദേഹം സൺസ് ഓഫ് ലിബർട്ടി എന്ന ഹ്രസ്വ ചിത്രത്തിന് മികച്ച ഹ്രസ്വ വിഷയത്തിനും കാസബ്ലാങ്ക എന്ന ചിത്രത്തിന് മികച്ച സംവിധായകനെന്ന നിലയിലും രണ്ട് തവണ അക്കാദമി അവാർഡ് ജേതാവാകുകയും ചെയ്തു.