ഫിനെഗൻസ് വെയ്ക്
From Wikipedia, the free encyclopedia
ഐറിഷ് സാഹിത്യകാരൻ ജെയിംസ് ജോയ്സ് എഴുതിയ പ്രഹസനസ്വഭാവമുള്ള നോവലാണ് ഫിനെഗൻസ് വെയ്ക് (Finnegans Wake - ഫിനെഗന്റെ ശവജാഗരണം). പരീക്ഷണശൈലിയിൽ എഴുതപ്പെട്ടിരിക്കുന്ന ഈ കൃതി ഇംഗ്ലീഷ് ഭാഷയിലെ ഏറ്റവും ദുർഗ്രഹമായ കഥാരചനകളിൽ ഒന്നായി അറിയപ്പെടുന്നു. പാരിസിൽ താമസിച്ചിരുന്ന ജോയ്സ് 1923-ൽ തുടങ്ങി പതിനേഴുവർഷമെടുത്ത് എഴുതിയ ഈ അന്തിമസൃഷ്ടി, ഗ്രന്ഥകർത്താവിന്റെ മരണത്തിനു രണ്ടു വർഷം മുൻപ് 1939-ലാണു പ്രസിദ്ധീകരിക്കപ്പെട്ടത്. "പുരോഗമിച്ചു കൊണ്ടിരിക്കുന്ന രചന"-യുടെ ഭാഗങ്ങൾ എന്ന പേരിൽ ചില ഖണ്ഡങ്ങൾ കൃതിയുടെ ദീർഘമായ രചനാകാലത്ത് പ്രസിദ്ധീകരണത്തിനു നൽകിയ ജോയ്സ് "ഫിനെഗൻസ് വെയ്ക്" എന്ന പേര് അവസാനം വരെ ഗോപ്യമായി വച്ചു.[1]
കർത്താവ് | ജെയിംസ് ജോയ്സ് |
---|---|
ഭാഷ | ഇംഗ്ലീഷ് |
പ്രസാധകർ | ഫേഫർ & ഫേബർ |
പ്രസിദ്ധീകരിച്ച തിയതി | 4 മേയ് 1939 |
മാധ്യമം | അച്ചടി |
ISBN | 0-14-118126-5 |
OCLC | 42692059 |
Dewey Decimal | 823/.912 21 |
LC Class | PR6019.O9 F5 1999 |
മുമ്പത്തെ പുസ്തകം | യുളീസീസ് (1922) |
ഒരു കെട്ടിടത്തിന്റെ മുകളിൽ നിന്നു വീണു മൃതിപ്പെട്ടെങ്കിലും ശവജാഗരണത്തിനിടെ (wake) നടന്ന ലഹരിശണ്ഠയിൽ ചുണ്ടിൽ വിസ്കി വീണതിനെ തുടർന്ന് പുനർജ്ജീവിച്ച ടിം ഫിനെഗൻ എന്ന കുമ്മായത്തൊട്ടി ചുമപ്പുകാരനെക്കുറിച്ചുള്ള ഐറിഷ് നാടോടിപ്പാട്ടിനെ[2] ആശ്രയിച്ചാണ് ഈ കൃതിയുടെ പേര്.[1][3]