Ази арслан

Ази арслан (Panthera leo persica) буюу Энэтхэг арслан,^[2][3][4] нь арслангийн нэгэн дэд зүйл юм. Уг дэд зүйл өдгөө зөвхөн Энэтхэгийн Гужарат мужийн Гир ойд л зэрлэгээрээ үлджээ.^[5][6] 2010 онд Гужаратын засаг захиргааны тооцоолсноор Гир ойд 411 толгой Ази арслан байсан нь өмнөх 2005 онд 52 толгой тоологдсонтой харьцуулахад өссөн үзүүлэлт юм.^[7]

Ази арслан
эрэгчин эмэгчин (эрслэн)
Ховордолтын зэрэглэл
Ховор (ОУБХХ) [1]
Биологийн ангилал
Аймаг: Амьтан Хүрээ: Хөвчтөн Анги: Хөхтөн Баг: Мах идэштэн Овог: Мийнхэн Төрөл: Panthera Зүйл: Арслан Дэд зүйл: P. l. persica
Латин нэр
Panthera leo persica Майер, 1826
Ази арслангийн өнөөгийн зэрлэг байгаль дахь тархалт
Ижил утгатай нэршил
Leo leo goojratensis (Энэтхэг) Leo leo persicus (Перс)

Энэтхэгт Ази арслангаас гадна мийнхэн овгийн Бенгалын бар, Энэтхэг ирвэс, цасны ирвэс, үүлэн ирвэс бий.^[8] Эрт цагт Ази арслан нь Газрын дундад тэнгисээс Энэтхэгийн хойгийн зүүн хойд хэсэг хүртэлх өргөн уудам нутагт тархан амьдардаг байсан ч хайр найргүй агналт, усны бохирдол, хоол тэжээлийн хомсдолоос болж тоо толгой, амьдрах орчин нь ихээр хорогджээ.^[9] Хуучин Ази арслан нь Бенгал, Араб, Перс арслан хэмээн гурав ангилагддаг байв.^[10] Ази арслан нь Африк арслантай харьцуулахад биеэр жижиг, хөнгөн боловч зан чанарын хувьд ижил юм.