Хошуу гэж хүн амьтны ам хамрын үзүүрийн тус газрыг хэлдэг бөгөөд салаа утгатай үг юм.
- Хүн амьтны ам хамрын үзүүрийн тус газар: хошуу хүргэх (а. Үнсэж таалах; б. [шилжсэн] Хов хэлэх), шувууны хошуу (шувууны амны дээд доод шовх хос эвэрлэгээс бүтэх хавчих тонших үзүүр), таван хошуу мал (хонь, ямаа, үхэр, адуу, тэмээ),
- Аймгуудын удирдлагад захирагдаж байсан орон нутгийн засаг захиргааны хуваарь - Тэр, засаг ноён болсоор хотол хошуу, албат ардаасаа татвар гувчуур нэг ч удаа татаагүй. Ж.Дамдин. Үймээний жил.,
- Юмны шувтарч дуусах үзүүр этгээд: анжисны хошуу (анжисны газар хагалах үзүүр хэсэг), бийрийн хошуу (а. Бийрийн зурах үзүүр; б. Бийрийн үсийг хамгаалах дугтуй), гутлын хошуу (гутлын хоншоор)
- Гурвалжин шовх хэлбэртэй юм: хошуу бин (гурвалжин бин: тэргүүн), хошуу торго (гурвалжин болгосон торго), хошуу хоргой (орой хоргойг ташуу хуваасны өрөөл нь), өрхний хошуу (өрхний гурвалжилсан үзүүр)