![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/a/a4/Aristoteles_Louvre.jpg/640px-Aristoteles_Louvre.jpg&w=640&q=50)
Aristóteles
From Wikipedia, the free encyclopedia
Aristóteles (an griego Αριστοτέλης) naciu an Stagira, na Calcídica (384 a.C. - 322 a.C.). Filósofo griego, aluno de Platon i porsor de Alxandre, l Grande, ye cunsidrado un de ls maiores pensadores de todos ls tiempos i criador de l pensamiento lhógico.
![Thumb image](http://upload.wikimedia.org/wikipedia/commons/thumb/a/a4/Aristoteles_Louvre.jpg/640px-Aristoteles_Louvre.jpg)
Aristóteles figura antre ls mais anfluentes filósofos griegos, al lhado de Sócrates i Platon, que trasformórun la filosofie pré-socrática, custruindo un de ls percipales fundamientos de la filosofie oucidental. Aristóteles prestou cuntribuiçones fundantes an dibersas árias de l coincimiento houmano, çtacando-se: ética, política, física, metafísica, lógica, psicologie, poesie, retórica, zologie, biologie, stória natural.
Ye cunsidrado por muitos l filósofo que mais anfluenciou l pensamiento oucidental, a eisemplo de las palabras que el criou i que passórun para quaije todas las lhenguas modernas (atualidade, axioma, catadorie, einergie, eissencia, potencial, poténcia, tópico, birtualidade i muitas outras). Sue anfluéncia tamien puode ser percebida na obra "La Debina Comédia" de Dante Alighieri yá que toda la astronomie dantesca se funda an Aristóteles i sous comentadores.
Fui chamado por Augusto Comte de "l príncepe eiterno de ls berdadeiros filósofos", por Platon de "l lheitor" (pula abideç cun que lhia i por se tener cercado de ls lhibros de l poetas, filósofos i homes de la ciéncia cuntemporáneos i anteriores) i, puls pensadores árabes, de l "precetor de la anteligéncia houmana". Por tener studado ua bariada gama de assuntos, i por tener sido tamien un deciplo que an mui sentidos ultrapassou l mestre, Platon, ye coincido tamien cumo L Filósofo. Aristóteles tamien fui chamado de l stagirita, pula tierra natal, Stagira.