Quemunicaçon
From Wikipedia, the free encyclopedia
Quemunicaçon ye un campo de coincimiento académico que studa ls porcessos de quemunicaçon houmana. Antre las subdisciplinas de la quemunicaçon, ancluen-se la teorie de l'anformaçon, quemunicaçon antrapessoal, quemunicaçon anterpessoal, marketing, publicidade, propaganda, relaçones públicas, análeze de l çcurso, telecomunicaçones i Jornalismo.
Tamien se antende la quemunicaçon cumo l'antercámbio d'anformaçon antre sujeitos ó oubjetos. Deste punto de bista, la quemunicaçon anclui temas técnicos (por eisemplo, la telecomunicaçon), biológicos (por eisemplo, fesiologie, funçon i eiboluçon) i sociales (por eisemplo, jornalismo, relaçones públicas, publicidade, audiobisual i meios de quemunicaçon de massa).
La quemunicaçon houmana ye un porcesso qu'ambolbe la troca d'anformaçones, i outeliza ls sistemas simbólicos cumo suporte para este fin. Stan ambolbidos neste porcesso ua anfenidade de maneiras de se quemunicar: dues pessonas tenendo ua cumbersa face la face, ó atrabeç de géstios culas manos, mensaiges ambiadas outelizando la rede global de telecomunicaçones, la fala, la scrita que permiten anteragir culas outras pessonas i efetuar algun tipo de troca anformacional.
Ne l porcesso de quemunicaçon an que stá ambolbido algun tipo d'aparato técnico qu'antermedie ls locutores, diç-se qu'hai ua quemunicaçon mediada.
L studo de la Quemunicaçon ye amplo i sue aplicaçon ye inda maior. Pa la Semiótica, l'ato de quemunicar ye la materializaçon de l pensamiento/sentimiento an signos coincidos pulas partes ambolbidas. Estes simblos son anton trasmitidos i reinterpretadas pul recetor. Hoije, ye antressante pensar tamien an nuobos porcessos de quemunicaçon, qu'angloban las redes colaboratibas i ls sistemas híbridos, que cumbinan quemunicaçon de massa i quemunicaçon pessonal i quemunicaçon horizontal.
L termo quemunicaçon tamien ye ousado ne l sentido de trasportes (por eisemplo, la quemunicaçon antre dues cidades atrabeç de camboios).