Serbidor
From Wikipedia, the free encyclopedia
An anformática, un serbidor ye un sistema de cumputaçon centralizada que fornece serbícios a ua rede de cumputadores. Esses serbícios puoden ser de natureza dibersa, cumo por eisemplo, arquibos i correio eiletrónico. Ls cumputadores qu'acessan ls serbícios dun serbidor son chamados clientes. Las redes qu'outelizan serbidores son de l tipo cliente-serbidor, outelizadas an redes de médio i grande porte (cun muitas máquinas) i an redes adonde la queston de la sigurança zampenha un papel de grande amportança. L termo serbidor ye largamente aplicado a cumputadores cumpletos, ambora un serbidor puoda eiquibaler a un software ó a partes dun sistema cumputacional, ó até mesmo a ua máquina que nun seia necessariamente un cumputador.
La stória de ls serbidores ten, oubbiamente, a ber culas redes de cumputadores. Redes permitian la quemunicaçon antre dibersos cumputadores, i, cul crecimiento destas, surgiu l'eideia de dedicar alguns cumputadores para prestar algun serbício a la rede, anquanto outros se outelizarian destes serbícios. Ls serbidores quedarian respunsables pula purmeira funçon.
Cul adbento de las redes, fui crecendo la necidade de las redes tenéren serbidores i menicumputadores, l qu'acabou cuntribuindo pa la diminuiçon de l'uso de ls mainframes.
L crecimiento de las ampresas de redes i l crecimiento de l'uso de la Anterneta antre profissionales i usuairos quemuns fui l grande ampulso pa l zambolbimiento i aperfeiçoamiento de tecnologies para serbidores.