ဒန္တကဋ္ဌသုတ်

^[၁] ဒန်ပူစားခြင်း၏ အကျိုးငါးပါးနှင့် ဒန်ပူမစားခြင်း၏ အပြစ်ငါးပါးတို့ကို ကဏှပက္ခ, သုက္ကပက္ခအားဖြင့် ဘုရားရှင်, ရဟန်းတို့အား ဟောတော်မူသည့်သုတ်။ ^[၂]

---

ဒန္တကဋ္ဌသုတ် သည် မြတ်စွာဘုရား ဟောကြားတော်မူခဲ့သည့် သုတ္တန်တစ်ခု ဖြစ်သည်။ ဤသုတ္တန်တွင် မြတ်စွာဘုရားသည် တံပူမစားခြင်း၏ အပြစ်ငါးမျိုးနှင့် တံပူစားခြင်း၏ အာနိသင်ငါးမျိုးကို ဟောကြားတော်မူခဲ့သည်။^[၃]

ဒန္တကဋ္ဌသုတ်

ရဟန်းတို့ တံပူမစားခြင်း၌ အပြစ်တို့သည် ဤငါးမျိုးတို့တည်း။ အဘယ်ငါးမျိုးနည်း ဟူမူ -

• မျက်စိ မကြည်လင်။
• ခံတွင်း အနံ့ မကောင်း။
• အရသာကို ဆောင်တတ်သော အကြောတို့ မစင်ကြယ်ကုန်။
• သည်းခြေ သလိပ်သည် အစာကို မြှေးယှက်ကုန်၏။
• ထို (တံပူမစား) သူအား ထမင်းမမြိန်။ ^[၃]

ရဟန်းတို့ တံပူမစားခြင်း၌ အပြစ်တို့သည် ဤငါးမျိုးတို့တည်း။^[၃]

ရဟန်းတို့ တံပူစားခြင်း၌ အာနိသင်တို့သည် ဤငါးမျိုးတို့တည်း။ အဘယ်ငါးမျိုးနည်းဟူမူ - ^[၃]

• မျက်စိ ကြည်လင်၏။
• ခံတွင်း အနံ့ ကောင်း၏။
• အရသာကို ဆောင်တတ်သော အကြောတို့ စင်ကြယ်ကုန်၏။
• သည်းခြေ သလိပ်သည် အစာကို မမြှေးယှက်။
• ထို (တံပူစား) သူအား ထမင်းမြိန်၏။ ^[၃]

ရဟန်းတို့ တံပူစားခြင်း၌ အာနိသင်တို့သည် ဤငါးမျိုးတို့တည်း ဟု (မိန့်တော်မူ၏)။^[၃]