နေပြည်တော်ဖွံ့ဖြိုးရေးဘဏ်

နေပြည်တော်ဖွံ့ဖြိုးရေးဘဏ် (အင်္ဂလိပ်: Naypyitaw Development Bank Limited) သည် နေပြည်တော် စည်ပင်သာယာရေး ကော်မတီက ရာခိုင်နှုန်းပြည့် မတည်ရင်းနှီးငွေ ထည့်ဝင်ထားသော ဘဏ်ဖြစ်ကာ^[၁] နေပြည်တော်၊ ဇမ္ဗူသီရိမြို့နယ်၊ သီရိရတနာအဆင့်မြင့်ဈေးဝင်း ၊ အမှတ် (၀၉) သီရိကျော်စွာလမ်းတွင် ဘဏ်ရုံးချုပ်ဖွင့်လှစ်ထားသည်။ ယခင်က နေပြည်တော်စည်ပင်ဘဏ်လီမိတက်အမည်ဖြင့် စတင်ဖွဲ့စည်းခဲ့သော်လည်း မြန်မာနိုင်ငံတော်ဗဟိုဘဏ်၏  ခွင့်ပြုချက်အရ နေပြည်တော် စည်ပင်ဘဏ်လီမိတက် (Naypyitaw Sibin Bank Limited) မှ နေပြည်တော်ဖွံ့ဖြိုးရေးဘဏ်လီမိတက်(Naypyitaw Development Bank Limited) အမည်သို့ ၂၀၂၀ ပြည့်နှစ်၊ မေလ ၉ ရက်နေ့တွင် ပြောင်းလဲခဲ့သည်။^[၂]

နေပြည်တော်ဖွံ့ဖြိုးရေးဘဏ်လီမိတက်
Naypyitaw Development Bank Limited (NDB)

အမျိုးအစား	နေပြည်တော်စည်ပင်သာယာရေးကော်မတီပိုင်
လုပ်ငန်း	ဘဏ်
တည်ထောင်သည့်နှစ်	၂၈ ဖေဖော်ဝါရီ ၂၀၁၃
ဌာနချုပ်	နေပြည်တော် ၊  မြန်မာ
ဝက်ဘ်ဆိုက်	naypyitawbank.com

ဘဏ်သမိုင်းကြောင်း

၂၀၁၃ ခုနှစ်တွင် နေပြည်တော်စည်ပင်ဘဏ်လီမိတက်အမည်ဖြင့် စတင်တည်ထောင်ခဲ့ပြီး ၂၀၁၃ ခုနှစ်၊ မေလ ၁၂ ရက်နေ့တွင် ဥတ္တရသီရိဘဏ်ခွဲကို ပထမဦးဆုံးဘဏ်ခွဲအဖြစ် ဖွင့်လှစ်ခဲ့သည်။

နေပြည်တော်ဖွံ့ဖြိုးရေးဘဏ်လီမိတက်၏ ခွင့်ပြုမတည်ခွင့်ပြုငွေရင်း (Authorized Capital) ၏ မူလ ခွင့်ပြုငွေမှာ ကျပ်သန်း(၅,၀၀၀) ဖြစ်သည်။ ၂၀၁၃ ဖေဖော်ဝါရီ ၂၈ ရက်နေ့တွင် ထည့်ဝင်ပြီး မတည်ငွေရင်း (Paid up Capital) အား ကျပ်သန်း (၂,၀၀၀) ဖြင့် စတင်ဆောင်ရွက်ခဲ့သည်။ ဗဟိုဘဏ်၏ ၂၀၁၅- ၂၀၁၆ ခွင့်ပြုချက်အရ ဘဏ်၏ ထည့်ဝင်ပြီးမတည်ငွေရင်း (Paid up Capital) ကို ကျပ်သန်း(၂၀,၀၀၀)အထိ တိုးမြှင့်ထည့်ဝင်ထားသည်။^[၃] နေပြည်တော်ဖွံ့ဖြိုးရေးဘဏ်သည် ၂၀၁၄ ခုနှစ် ဖေဖော်ဝါရီလ ၁၇ ရက်နေ့တွင် ဇမ္ဗူသီရိဘဏ်ခွဲကို ဖွင့်လှစ်ခဲ့ပြီး ၂၀၂၂ ခုနှစ် နောက်ဆုံးစာရင်းများအရ  ဇမ္ဇူသီရိဘဏ်ခွဲ၊ ဥတ္တရသီရိဘဏ်ခွဲ၊ သပြေကုန်းဘဏ်ခွဲ၊^[၄] မြို့မဈေးဘဏ်ခွဲ၊ အာဟာရသုခဈေးဘဏ်ခွဲ၊ ပျဉ်းမနားဘဏ်ခွဲ၊ တပ်ကုန်းဘဏ်ခွဲ၊ မန္တလေးဘဏ်ခွဲ၊ လယ်ဝေးဘဏ်ခွဲနှင့် ရန်ကုန်ဘဏ်ခွဲဟူ၍ ဘဏ်ခွဲ ၁၀ ခုအထိ ဖွင့်လှစ်ထားသည်။^[၅]