ပိုက်ကျော်ခြင်း

ပိုက်ကျော်ခြင်းဆိုသည်မှာ ကွင်းထဲတွင် ပိုက်တားပြီး တစ်ဖက်နှင့်တစ်ဖက် ယှဉ်ပြိုင်ခတ်ရသော အားကစားဖြစ်သည်။ အရှေ့တောင်အာရှနိင်ငံများတွင် ထွန်းကားသည်။ အရှေ့တောင်အာရှပြင်ပရှိ တရုတ်၊ ဘရာဇီးစသောနိုင်ငံများတွင်လည်း စတင်ခေတ်စားလာပြီဖြစ်သည်။

ဖြစ်ပေါ်လာပုံ

ပိုက်ကျော်ခြင်းအားကစားနည်းမှာ အရှေ့တောင်အာရှနိုင်ငံများမှ အစပြုပြီး ဖြစ်ပေါ်လာပြီး နိုင်ငံတကာတွင် ခေါ်ဆိုသော အမည်မှာ Sepak takraw ဟု ဖြစ်သည်။ အဓိပ္ပာယ်မှာ Sepak ဟူသောစကားလုံးမှာ မလေးဘာသာအရ "ကန်သည်" ဟု အဓိပ္ပာယ်ရပြီး Takraw ဟူသောစကားလုံးမှာ ထိုင်းဘာသာအရ "ခြင်းလုံး" ဟု အဓိပ္ပာယ်ရသည်။ ပိုက်ကျော်ခြင်းအားကစားနည်းတွင် အင်အားအကြီးဆုံးနိုင်ငံများမှာ မလေးရှားနိုင်ငံနှင့်ထိုင်းနိုင်ငံတို့ဖြစ်ကြသည်။

သမိုင်း

ရှေးအကျဆုံးမှတ်တမ်းများအရ ပိုက်ကျော်ခြင်းအားကစားနည်းကို AD ၁၅ ရာစုနှစ်တွင် မလက္ကာရေလက်ကြားဒေသများတွင် အစောဆုံးကစားခဲ့ကြသည်ဟု မလေးရှားနိုင်ငံ သမိုင်းမှတ်တမ်းများအရသိရသည်။

ပြိုင်ပွဲများ

နိုင်ငံတကာပိုက်ကျော်ခြင်းအားကစားပြိုင်ပွဲများကို ISTAF, the International Sepak Takraw Federation (အပြည်ပြည်ဆိုင်ရာပိုက်ကျော်ခြင်းအဖွဲ့ချုပ်)မှ ကြီးမှူးကျင်းပလေ့ရှိသည်။ အပြည်ပြည်ဆိုင်ရာပိုက်ကျော်ခြင်းအဖွဲ့ချုပ် ထိပ်သီးများပြိုင်ပွဲ (ISTAF Super Series ) , အပြည်ပြည်ဆိုင်ရာပိုက်ကျော်ခြင်းကမ္ဘာ့ဖလား (ISTAF World Cup) , ထိုင်းဘုရင့်ကမ္ဘာ့ဖလားတံခွန်စိုက်ပြိုင်ပွဲများအား နှစ်စဉ်ကျင်းပလေ့ရှိသည်။ အာရှအားကစားပြိုင်ပွဲများနှင့် အရှေ့တောင်အာရှအားကစားပြိုင်ပွဲများတွင်လည်း ပိုက်ကျော်ခြင်းအားကစားနည်းမှာ ပုံမှန်ပါဝင်နေကြ အားကစားနည်းတစ်ခုဖြစ်သည်