Plautdietsch
From Wikipedia, the free encyclopedia
Et Plautdietsch of Mennonitisch Platduuts is een tael die tot de Zuudwest-Germaanse groep van de West-Germaanse taelen beheurt. Pattie taelkundigen zien et Plautdietsch, vanwege et feit dat et uut et Oost-Nederduuts ontstaon is, nog altied as een subdialekt van et Oost-Nederduutse Nederprusisch. De meersten zien et tegensworig liekewel as een apatte Nedersaksische dialektgroep, ok omdat et veur sprekers van et Nederduuts (in noordelik Duutslaand) en et Nedersaksisch (in noordoostelik Nederlaand) deur zien ieuwenlange ofzunderlike ontwikkeling niet hielendal meer verstaonber is.
Plautdietsch | |
---|---|
Internationaole naeme | Plautdietsch |
Aandere naeme | Mennonitisch Platduuts |
Taelgebied | verschillende enklaves in westelik, centraol en veural zuudwestelik Siberië en noordelik Kazachstan en Kirgizië; verschillende gemienschoppen in Noord- en Zuud-Amerike en Duutslaand |
Antal sprekers | 400.000 |
Jaor | 2004 |
Dialekten | ondudelik |
Taelklassifikaosie |
|
Biebelvertaling | gien (Ni'je Testement 1987) |
Schrift | et Latiense alfabet |
Taelstaotus | et Plautdietsch wodt nargens erkend as minderhiedstael |
Taelkode ISO 639-1 | n.v.t. |
Taelkode ISO 639-2 | n.v.t. |
Taelkode ISO 639-3/DIS | pdt |
De naeme Plautdietsch het dezelfde oorsprong as et woord Platduuts of Plattdüütsch, de woorden dietsch of duuts/düütsch betekenen in beide gevallen niet Duuts, mar tael van et volk.
Een groot pat van de luden in de mennonitische gemienschoppen waor et Plautdietsch ontston, was ofkomstig uut Frieslaand en aandere patten van Nederlaand. In de woordeschat van et Plautdietsch bin, naost et Nedersaksisch, nog altied invloeden van et Nederlaans en et Fries herkenber. Et Plautdietsch wodt daoromme ok wel zien as een tussenvorm van et Nederduuts en et Nederlaans.