Dweilorkest

Een dweilorkest, dweilband, plezeerkapel (en alle meugelike samentrekkingen van disse namen) is een bloasorkest met bloazers en slagwoarkers. Et dool van disse bands is feest maken. Dat kan biej alle soorten feest wean: biej brulften, sportevenementen, carnaval, dörpsfeeste, bröaderiejen, koarmse en feitelik allens woeras de leu mer ne anvroage vuur doot. Wovölle orkesten of der precies zint, is lastig te zeggen. Wat kapellen ontstoat spontaan of eenmoalig, anderen stoat registreerd mer spölt neet mear.

Kapel De Kamgoarn Klösse oet Riesn

Wat vuur instrumenten as der an metdoot is biej alle kapellen wier anders. Duur mekoar besteet et bloaswoark van een dweilorkest oet trompetten, skoeftrompetten, saksofoons, baritons/eufoniums en sousafoons. Et slagwoark besteet minstens oet ne kleine tromme, grote tromme en bekkens. Vake slept ze nog kleindere soorten handslagwoark biej met.

Vake heurt ne plezeerkapel biej ne karnavalsverenige of ne oaverkoepelende muziekverenige. Wat kapellen stoat op zikzelf.

Muziek

Dweilorkesten spölt duurgoans olde kneiters van 'n carnaval. Mer ook bewoarkingen van wearldhits könt met. Mangs kump der een top-40 hit tuskenduur. Ook Duutse schlagers, marsmuziek en polka´s zint welkom.

Bekende nommers wat iederen kapel al wal es espöld hef:

• Rosamunde
• Kleine Café aan de Haven
• Slavenkoor van Nabucco
• Sweet Caroline
• Country Roads (Take me Home)

Wieter wördt hier dan nog vake regionaal bekeande nommers biej edoan.

Dweildage en festivals

Et kapellengeweld kump mangs te hope op dweildage en festivals. De bekendste wordt in Oost-Nederland organiseerd. Vuural in Grolle, Zutfen, Oldenzel en Bemmel. Den lesten is tegelieke ook et Nederlands Kampioenskop.

Naamn

Et woord "dweil" kump van et Hollandse "dweilen", wat "doelloos/dikke oawer stroate bungeln" bedudt. In Broabant en Limbörg is et gewoonte um met Carnaval van kafee noar kafee te "dweilen". In 1959 leup der in Mestricht een groepken muzikanten met zonnen dweil met. Dee neumden zik 'n Zate Hermenie. Det bevöl good en et gebroek verspreidden zik oawer heel Limburg, en geleidelik oawer heel Nederland. Der wordt vake meand at n naam kump van de dweilpauzes biej skaatswedstrieden, umdat dan vake een dweilorkest et publiek vermaakt.

Orkestenantal/statistiek

Volgens ne olde skatting har Nederland 1517 kapellen duur et hele land. In duursnee is dat 126 kapellen de provincie. Noord-Broabant stekt der met kop en skolders boaven oet met 814 kapellen. Doarnoa kump Limburg met 236 bands. De provincie met de minste kapellen is Flevoland: 1 kapel.

Provincie	Freesland	Grönning	Drenthe	Oaveriessel	Gelderland	Noord-Holland	Zuud-Holland	Flevoland	Utrecht	Noord-Broabant	Limburg	Zeeland
Inwonners	643.000	574.000	482.000	1.106.000	1.967.000	2.587.000	3.452.000	360.000	1.162.000	2.407.000	1.139.000	379.000
Dweilorkesten	13	10	94	96	127	45	96	1	39	814	236	33
% Dweilorkesten	0,9%	0,7%	6,2%	6,3%	8,4%	2,9%	6,3%	-0,1%	2,6%	53,7%	15,6%	2,2%
Ratio inwonners t.o.v. dweilorkesten	3,9% vs. 0,9%	3,5% vs. 0,7%	2,9% vs. 6,2%	6,8% vs. 6,3%	12,1% vs. 8,4%	15,9% vs. 2,9%	21,2% vs. 6,3%	2,2% vs. -0,1%	7,1% vs. 2,6%	14,8% vs. 53,7%	7,0% vs. 15,6%	2,3% vs. 2,2%

In duursnee zitt der 18 man biej nen kapel. Mangs wordt doar vriejwilligers ook biej erekkend. Der zint kapellen dee't mear as 20 man hebt, anderen komt neet heuger as tiene. Duur de boot enömmen spölt ongevear 27.300 leu in Nederland in nen kapel.

Mooi um te weten

Op ne olde webstea ewieded an kapellen wör een onderzeuk edoan noar de stereotiepen oaver kapelleden:

• Basspöllers en trombonisten könt vake den meesten beer drinken.
• Muzikale leiding van de kapel hef meesttieds nen trompettist. Doarnoa nen saksofonist, dan mangs nen trombonist. Slagwoarkers zint hoaste nooit kapelmeisters. Dee könt duurgoans gin toonheugtes leazen van papier en dan wördt et lastig.
• As 'gezichte van de kapel' meant völle orkesten at et öaren grote trommespöller is of bassist. Doarnoa ook wal et hele slagwoark.
• Et meest kenmoarkende instrument is volgens de meesten wal de trombone.
• Der zitt mear kearls as vrouwleu biej kapellen.
• Zowat alle bassisten en trombonisten zint kearls. De meeste holtbloazers zint vrouwe.
• As de vrouwleu gin holtinstrument spölt, doot ze op nen bariton of trompet.

Bekende kapellen

• Love Hendels oet Putten
• Kleintje Pils
• TismawajewendBand oet Roalte
• Blauhúster Dakkapel oet Sneek
• Mambo Beach Band

Ne handevol oosterse kapellen:

• Hengeler Weendbloazers oet Hengel
• De Niksnött'n oet Hengel
• Jigger Bigger Band oet Eanske
• Herriemakers oet Wierden
• Dwarsliggers oet Eanter
• Kamgoarn Klösse oet Riessen
• De Wilhelmientjes oet Riessen
• Helderse Klepperbloazers oet Heldern
• Trottoirband oet Nijverdal
• De Draodnaegel oet Lonneker
• Olnzelse Kopperbloazers oet Oldenzel
• Hijskraan oet Oldenzel
• De Blaanke Bössels oet Oldenzel

Oetgoande verbeendege

• www.plezierkapel.nl
• www.dweilorkesten.info

Commons: Dweilorkest - plaatjes, filmkes en/of gelüüdsbestanden.