Wilsum (Overiessel)

Wilsum is n dörp en veurmaolige gemeente an de Iessel in de gemeente Kampen in de Nederlandse provinsie Overiessel. Wilsum ad op 1 jannewaori 2010, 827 inwoners.^[1]

De Sunte-Lambärtuskärke, Wilsum

Kiek op Wilsum

De Iesseloever bi'j Wilsum

Geschiedenis

Wilsum is ebouwd op n rivierdune. De plaatse wördt veur t eerst vermeld in 1213. Al véúr 1321 kreeg Wilsum van de bisschop van Utrecht stadsrechten^[2]. Wöörskienlik wol de bisschop iermee zien machtsposisie tegenover Kampen verstärken ^[3]. In karakter is Wilsum altied n dörp ebleven. Töt 1937 was Wilsum n zelfstandige gemeente.

De ervörmde kärke

De ervörmde Sunte-Lambärtuskärke, die van rond 1050 stamt, is een van de oldste kärken van Overiessel. Volgens de ervörmde kärkvoogdi'je van Wilsum zelfs dé oldste. In 1580, toen de reformasie begun, wieren de erediensten vervangen deur protestantse en wieren de 'Roomse kenmärken' van t gebouw e-aald. In 1975 wier t elemaole erestaureerd.

Folklore

In Wilsum wördt nog op de leste zaoterdag van augustus, (31 augustus was de verjöördag van Koningin Wilhelmina), t ‘oranjefeest’ evierd.

Natuurbe-eer

Bi'j Wilsum e'j n paar nöstpaolen veur ooievaars op-esteld die met wisselend sukses brödparen trekken. t Uterweerdengebied buten t dörp met olde rivierärms wördt veur n groot deel as Natura 2000 natuurgebied be-eerd (de Scherenwelle). Bedreigde vogelsoorten as de zwärte stern en de kwärtelkoning nöstelen ier. Der komen zeldzame en beskärmde planten veur zoas de kieftsbloeme. t Gebied is onderdeel van t Nasionaal Landskap Iesseldelta.

Taalveurbield

Zo droom ik mien de vekantiedagen
liggend in mien warme nös.
De warkelijkheid is wel even anders
met striemende regen, zo kold det 't aost vrös.

In jekker en op rubberleerzen
banjere ik deur 't natte zand
de grieze golven brult en buldert
't schoem is goorgeel - ik wone in Nederland.

Uut 't gedicht 'Dag dromen' deur Dicky Kersing, in: Pluzen. Verhalen en gedichten in de streektaal, Kampen: Iesselakkedemie, 1997

Kunnigheid

Uut Wilsum kwaamp de keunstschilder Tiem Evink (1918-2009).