प्राचीन ग्रीस

प्राचीन ग्रीस ग्रीसया इतिहासया छगू लहना ख। थ्व लहना ८गु व ६गु शताब्दी ईपूया आर्काइक युग निसें १४६ इपू (कोरिन्थया ल्वापू धुंकाया यवनया रोमन कब्जा) तक्क अस्तित्वय् दूगु ख। थ्व कालखण्डया मध्यय् क्लासिक यवन ला। क्लासिक यवन युग ५गु व ४गु शताब्दी इपूइ अस्तित्वय् वःगु छगू कालखण्ड ख। थ्व कालखण्डय् न्हापा एथेन्सया नेतृत्त्वय् यवनमि तयेसं पर्सियन अतिक्रमणयात परास्त यात। थ्व धुंका पलिस्था जूगु एथेन्सया स्वर्ण युग ४०४ इपूइ पेलेपोनेसियन युद्धय् एथेन्सया स्पार्ताया ल्हातं पराजयय् क्वचाल।

पार्थेनन एथेना देवीयात देछाना तःगु एक्रोपोलिस, एथेन्सया देगः। थ्व देगः प्राचीन यवनया दक्ले नांजाःगु संरचनाय् छगू ख।

क्लासिकल यवन संस्कृतिया थ्व धुंका शक्तिशाली जूगु रोमन साम्राज्यय् तधंगु प्रभाव लावन। रोमन साम्राज्यं यवन संस्कृतिया थी-थी संस्करण भूमध्यसागरीय क्षेत्रय् व युरोपय् प्रचार यात। थ्व कारणं प्राचीन यवनयात पाश्चात्य संस्कृतिया आजुया रुपय् नालेगु या।

साहित्य व दर्शन

प्राचीन यवन साहित्ययात सुकरात पूर्व व सुकरात धुंकाया इलय् बायेछिं। सुकरातपूर्वया कालखण्डय् मिलेसियन दर्शन (Milesian school), जिनोफेन्स, पाइथागोसरवाद, हेराक्लितस, इलियातिक दर्शन, प्लुरलिजम व एतमिजम, सोफिजम आदि ला। प्राचीन यवन दर्शनया शास्त्रीय कालखण्ड सुकरातनापं शुरु जूगु ख। सुकरात धुंकाया मू दार्शनिक प्लेतो व एरिस्तोतल ख।