Aleksander Kwaśniewski

Aleksander Kwaśniewski (fødd 15. november 1954) er ein polsk politikar og tidlegare statsleiar frå Białogard. Han var president i Polen frå 1995 til 2005, vald for Venstrealliansen (SLD).

Aleksander Kwaśniewski
Fødd	15. november 1954 (70 år) Białogard
Statsborgar av	Polen
Religion	ateisme
Yrke	politikar, journalist
Institusjonar	Georgetown University
Utdanna ved	Universitetet i Gdańsk
Ektefelle	Jolanta Kwaśniewska
Barn	Aleksandra Kwaśniewska
Medlem	Socjalistyczny Związek Studentów Polskich
Alle verv	Polens president (1995–2005) medlem av Sejm (1991–1993)

Kwaśniewski utdanna seg i transportøkonomi ved universitetet i Gdansk. Han gjorde karriere i det statsleiande polske arbeidarpartiet og var sports- og ungdomsminister 1985–89. Frå 1989 til -91 var han president i Polens olympiske komité. Etter dei store politiske omveltingane i Polen stifta han i 1990 eit sosialdemokratisk parti (SdRP) og leia partiet til 1995. I 1991 var han med å stifte Venstrealliansen (SLD), leiar av alliansen frå 1993. Han var medlem 1991-95 av nasjonalforsamlinga Sejm.

Ved presidentvalet i 1995 fekk Kwaśniewski 51,7 prosent av røystene i andre valomgang og vann dermed over motkandidaten Lech Wałęsa. Kwaśniewski tok over som president 23. desember 1995 og førte ein markant provestlig reformpolitikk som opna for marknadsøkonomi og politisk-militær tilknyting til dei vesteuropeiske stormaktene og USA. Såleis vart Polen medlem i OECD i 1996 og NATO i 1999. Hausten 2000 var Kwaśniewski attvald i fyrste valomgang med 53,9 prosents oppslutnad. I den andre og siste presidentperioden hans gjekk Polen i 2004 inn i Europaunionen (EU). Han var president til 22. desember 2005 og vart etterfylgd av den sosialkonservative politikaren Lech Kaczyński.

Kjelder

• Aleksander Kwaśniewski (26. februar 2020) i Store norske leksikon