Altamont-festivalen

Altamont-festivalen, på engelsk Altamont Speedway Free Festival eller Altamont Free Concert, var ein rockekonsert som blei halden laurdag 6. desember 1969 ved Altamont Speedway nord i California. Festivalen blei organisert av The Rolling Stones, som spelte med Santana, Jefferson Airplane, The Flying Burrito Brothers og Crosby, Stills, Nash & Young.^[1] Grateful Dead skulle også ha spelt, men nekta å gå på scena på grunn av den aukande valden ved konserten.^[2] Festivalen er best kjend for denne valden, som omfatta drap på ein publikummar på scena av eit Hells Angels-medlem, som var blitt hyra inn som vaktar. Det fann også stad tre dødsulukker, fleire skader, tjuveri og vandalisme.^[3] Det blei fødd fire barn under festivalen.^[4]