Anders Todal

Anders Arnson Todal (fødd 18. mars 1883 i Valsøyfjord i Møre og Romsdal, død 6. mars 1956) var ein norsk lærar, skuledirektør, Venstre-politikar og mållagsleiar.

Sjå òg «Anders Todal Jenssen» og «Per Anders Todal».

Anders Todal
Fødd	18. mars 1883 Valsøyfjorden
Død	6. mars 1956 (72 år)
Statsborgar av	Noreg
Parti	Venstre
Yrke	politikar, bonde, lærar, klokkar, skoledirektør
Utdanna ved	Levanger lærerhøgskole
Alle verv	stortingsrepresentant (1931–1933) ordførar i Åsen (1920–1922) ordførar i Åsen (1926–1931) vararepresentant til Stortinget (1919–1921) vararepresentant til Stortinget (1928–1930)

Han var elev ved ulike lærarkurs i norsk, pedagogikk og gymnastikk, og elev ved Nordmøre amtsskule (1900–1901), før han tok eksamen ved Levanger lærarskule i 1904. Han arbeidde som lærar i Åsen frå 1905 til 1933, og ved Skogn folkehøgskole i 1915–1916. Han var klokkar i Åsen kyrkje frå 1918, og kjøpte garden Vatn i Åsen frå svigerfaren i 1930. Todal var konstituert skuledirektør i Nidaros bispedømme frå 1933 til 1942 og 1945 til 1953. Han var styremedlem i Norsk Lærarlag frå 1917 til 1933, styremedlem i Noregs Ungdomslag frå 1917 til 1921 og formann i Noregs Mållag frå 1932 til 1936.

Todal var medlem av Åsen heradsstyre frå 1910 til 1945. Han var varaordførar i kommunen i perioden 1913–1919 og ordførar i periodane 1919–1922 og 1925–1931. Han var formann i Nord-Trøndelag Venstrelag i åra 1931–1945. Todal var innvald på Stortinget frå Nord-Trøndelag frå 1931 til 1933, og der var han medlem av Stortingets kyrkje- og skulekomité.

Under den andre verdskrigen vart Todal arrestert 9. oktober 1942, og sat fengsla på Misjonshotellet i Trondheim fram til 13. oktober, i Lofjorden i Åsen fram til 11. november, på Vollan 12.–19. november, og på Falstad 20. november 1942–22. februar 1943.

Anders Todal vart tildelt Kongens fortenestmedalje i gull.

Fetteren Anders Andersson Todal (1884-1963) var og lærar, og endte som statsarkivar i Trondheim 1934-1954.

Kjelder

• Norsk biografisk leksikon.16. Oslo: Aschehoug. 1969. s. 403–406.
• Norske skolefolk. Stavanger: Dreyer. 1934. s. 1243.
• «Anders Todal» i Allkunne, innhenta 18. desember 2009.
• Biografisk informasjon om Anders Todal NSD Norsk senter for forskningsdatas politikararkiv