Anna Rogstad

Anna Georgine Rogstad (26. juli 1854–8. november 1938) var den første kvinna som tok sete i Stortinget, den 17. mars 1911. Rogstad var ein norsk lærar, kvinnesakskvinne og politikar for Frisinnede Venstre frå Veisten i Nordre Land.

Anna Rogstad Anna Georgine Rogstad
Anna Rogstad på Stortinget 19. mars 1911. Foto: Anders Beer Wilse / Nasjonalbiblioteket
Fødd	26. juli 1854 Nordre Land
Død	8. november 1938 (84 år)
Statsborgar av	Noreg
Parti	Frisinnede Venstre
Yrke	Lærar, skulestyrar
Medlem	Norsk Kvinnesaksforening Kvindestemmeretsforeningen
Verv	Stortingsrepresentant 17. mars 1911–30. januar 1913
Alle verv	stortingsrepresentant (fast møtande vararepresentant, 1912–1913) vararepresentant til Stortinget (1910–1912)

Bakgrunn

Anna Rogstad vart lærarinne i Kristiania i 1877, og i 1889 vart ho leiar i Kristiania Lærerinneforening, eit verv ho hadde i 32 år. Ho endra foreininga frå å vere ein selskapeleg samskipnad til ein fagorganisasjon. Då Norges Lærerinneforbund, ein landsorganisasjon for folkeskolelærarar, vart danna i 1912, var Rogstad leiar fram til 1919. Ho ville betre utdanninga for jenter og starta i 1900 ein framhandsskule for jenter attåt folkeskulen. Skulen vart populær, og Kristiania kommune overtok han i 1909. Anna Rogstad heldt fram som styrar til ho gjekk av med pensjon i 1923.

Anna Rogstad var med å skipa Norsk Kvindesagsforening i 1884 og Kvindestemmeretsforeningen i 1885. Ho var nestleiar for Kvindestemmeretsforeningen i 1885-97 og 1902-13.

I Kristiania representerte Rogstad lærarinnene i skulestyret frå 1894 til 1916. Ho vart vararepresentant til bystyret for Kvindestemmeretsforeningen i 1901, representant til bystyret på ei fellesliste av Høire, Den liberale vælgerforening og Næringspartiet i 1907 og vararepresentant til bystyret for Frisinnede Venstre i 1910.

Rogstad var 1. vararepresentant til Stortinget frå 1910 til 1912. Ho representerte Frisinnede Venstre på et fellesliste med Høire, der Høire-mannen Jens Bratlie stod øvst. Anna Rogstad møtte som første kvinne på Stortinget 17. mars 1911. Ho møtte i kortare periodar i 1911, og da Jens Bratlie vart statsminister i februar 1912, møtte ho så lenge regjeringa sat, til januar 1913. Ho var ein aktiv representant som engasjerte seg i ei rekkje saker, frå forsvar og utdanning til kultur og likestilling.

Kjelder

• Denne artikkelen bygger på «Anna Georgine Rogstad» frå Wikipedia på bokmål, den 22. januar 2011.
• Anna Rogstad frå Norsk biografisk leksikon

Bakgrunnsstoff

• Agerholt, Anna Caspari (1973) Den norske kvinnebevegelseshistorie. Oslo: Gyldendal.
• Hagemann, Gro (1992) Skolefolk. Lærernes historie i Norge. Oslo: Gyldendal.
• Moksnes, Aslaug (1984) Likestilling eller særstilling? Norsk Kvinnesaksforening 1884-1913. Oslo: Gyldendal.
• Norges officielle statistik V.128 (1910) Stortingsvalget 1909. Kristiania: i kommission hos H. Aschehoug & Co.
• Nylænde, Norsk Kvinnesaksforenings blad, 1889-1923.
• Stortinget og Statsraadet 1814-1915 (1915). Kristiania: Steen'ske Bogtrykkeri.
• Anna Rogstad i Stortinget.
• Anna Rogstad Arkivert 2014-03-05 ved Wayback Machine. i Norsk samfunnsvitenskapelig datatjeneste.