Dave Weckl

Dave Weckl (fødd 8. januar 1960) er ein omtykt trommeslagar.

Dave Weckl
Statsborgarskap	USA
Fødd	8. januar 1960 (65 år) Saint Louis
Yrke	trommeslagar, jazzmusikar, studiomusiker
Språk	engelsk
Nettstad	http://www.daveweckl.com/
Dave Weckl på Commons

Idolet til Weckl var den legendariske trommeslagaren og storbandleiaren Buddy Rich, og han fordjupa seg i jazzstudiar på University of Bridgeport i Connecticut. Han har likevel gjort seg mest til merke innan fusion-sjangeren, og karrieren hans starta i fusionmiljøet i New York på byrjinga av 1980-åra. Han vart tidleg lagt merke til, og spelte etterkvart med artistar som Paul Simon, Madonna, George Benson, Michael Camilo og Anthony Jackson. Det han i ettertid er mest kjend for frå denne perioden, er likevel arbeidet han gjorde med Chick Corea sitt Elektric Band frå 1985 til 1991.

Weckl spelte med Corea i sju år. I denne perioden spelte han inn mange album, både med Elektric Band og med Corea sitt Akoustic Band. Samtidig gjorde han mange studioinnspelingar og innspelingar med GRP All-Star Big Band. I 1990 gav han ut den første plata som bandleiar, Master Plan, for selskapet GRP. Etter han slutta i Corea sitt band har han spelt særleg mykje i bandet til gitaristen Mike Stern, i tillegg til å halde fram solokarriera.

Det er særleg i trommemiljøet Weckl har fått mykje merksemd. Han har nytta dette til å produsere ei rekkje instruksjonsvideoar og bøker, og han har samarbeidd med ulike selskap som produserer signaturmodellar av ulikt trommeutstyr.

Diskografi

Dave Weckl:

• 1990 Masterplan (GRP records)
• 1992 Heads Up (GRP records)
• 1994 Hard Wired (GRP records)

Dave Weckl Band:

• 1998 Rhythm of the Soul (Stretch records)
• 1999 Synergy (Stretch records)
• 2000 Transition (Stretch records)
• 2001 The Zone (Stretch records)
• 2002 Perpetual motion (Stretch records)
• 2003 Live (and very plugged in) (Stretch records)
• 2005 Multiplicity (Stretch records)

Bakgrunnsstoff

• Heimeside for Dave Weckl