Islandsgrønkurle

Islandsgrønkurle (Dactylorhiza viridis ssp. islandica) er ei plante i orkidéfamilien (marihandfamilien) Orchidaceae.^[1]

Islandsgrønkurle
Status i Noreg: Kritisk truga
Systematikk
Rike:	Planteriket
Klasse:	Einfrøblada
Orden:	Aspargesordenen
Familie:	Orkidéfamilien
Slekt:	Dactylorhiza
Art:	D. viridis
Vitskapleg namn
Dactylorhiza viridis ssp. islandica (Lindley)
Økologi
Habitat:	sanddynelandskap
Utbreiing:	Jæren, Island

Systematikk

Islandsgrønkurle er ein underart av grønkurle, stuttare og med meir kompakt aks enn nominatunderarten smågrønkurle (ssp. viridis). Underarten var tidlegare plassert i slekta Coeloglossum med namnet Coeloglossum viride ssp. islandicum, men på grunn av det nære slektskapet til slekta Dactylorhiza, på norsk marihandslekta, er grønkurlene overførte dit i den norske klassifiseringa.^[2] Andre stader har ein valt å halde på Coeloglossum-namnet.

Utbreiing

Islandsgrønkurle veks på fuktig sanddyne og rikmyr på og nær sanddyner. I Noreg er utbreiinga avgrensa til to små og sårbare funnstader på kysten av Jæren.^[3] I Norsk raudliste for artar (2021) er underarten oppgradert frå sterkt truga (EN) til kritisk truga (CR).^[4]

Islandsgrønkurle veks òg på Island (status LC, islandsk namn barnarót).^[5][6] Det skal òg vere denne underarten som er rekna som sjáldsom på Færøyane (færøysk namn grønligt hjúnagras).^[7][8]

Hybridar

Om det er underarten islandsgrønkurle som finst på Færøyane, så er det registrert eit funn frå 1990 av hybriden med flekkmarihand, men registrert utan at underarten er gitt (Dactylorhiza maculata ssp. maculata × viridis eller Dactylorhiza ×conigera).^[9][10]