Jens Lunde

Jens Lunde (24.januar 1884–13. november 1974) var ein norsk landbruksmann frå Aurland i Sogn. Han var stortingsrepresentant for Bondepartiet 1945-53.

Jens Lunde
Fødd	24. januar 1884 Aurland kommune
Død	13. november 1974 (90 år)
Statsborgar av	Noreg
Parti	Senterpartiet
Yrke	politikar, agronom
Alle verv	stortingsrepresentant (1945–1950) vararepresentant til Stortinget (1931–1933) vararepresentant til Stortinget (1934–1936) vararepresentant til Stortinget (1937–1945) stortingsrepresentant (1950–1954)

Liv og gjerning

Lunde gjekk skulevinterane 1901/02 Sogndal Folkehøgskule og 1902/03 ein jordbruksskule på Rikheim i Lærdal. Etter eksamen ved Noregs Landbrukshøgskule 1907, fekk han stipend og studerte saueavl i Skottland same året. Åra 1909-12 underviste han på Stend jordbruksskule, deretter var han 1912-17 fylkesagronom i Sunnfjord. Med ytterlegare studieturar til Danmark, Sverige og Tyskland i 1920 og 1931, gav han ut ei lærabok i saueavl.

I 1917 overtok Lunde farsgarden i Aurland og starta ein privat landbruksskule, seinare kjend som Sogn jord- og hagebruksskule. Denne skulen styrte han til 1923. Frå 1923 til -49 var han landbrukssekretær i Sogn og Fjordane, sidan var han landbrukssjef i fylket til 1954.

Lunde var medlem av heradsstyret i Aurland frå 1919 til 1941. Han var ordførar i heradet 1926–28 og 1936–41.

Lunde var vararepresentant frå Sogn og Fjordane og Bondepartiet i tre periodar 1931–1945. Frå hausten 1945 hadde han fast plass på Stortinget frå same valkrinsen og partiet, og vart hausten 1949 attvald for fireårsperioden 1950-53. Han var både sekretær og nestformann i Landbrukskomiteen.

Kjelder

• Norsk Allkunnebok. VIII. bandet. 1957
• «Jens Lunde». Stortinget.no.

• Norske landbrukskandidater. Oslo: Hanche. 1932.
• Øvre-Eide, Rasmus (1973). Stortingsval og stortingsmenn i Sogn og Fjordane 1814-1970. Sandane: Nordfjord sogelag.