Krageflagellat

Krageflagellatar eller choanoflagellatar er ei gruppe fastsitjande protozoar med flagell. Dei er merkverdige mest på grunn av at dei vert rekna som den gruppa eincella organismar som er nærast i slekt med dei fleircella dyra, noko ein ser både via gensekvensar og ved å samanlikna dei med somme celler i svampedyr.

Krageflagellat
Monosiga brevicollis
Systematikk
Klasse:	Krageflagellat Choanoflagellatea Cavalier-Smith, 1998

Levesett

Krageflagellatar finst både som reint eincella og i koloniar. Cellene er avlange med ein einskild flagell dei nyttar til å danna ein virvelstraum med. Denne straumen fører bakteriar og andre matpartiklar ned i kragen, som består av microvilli og fungerer som eit slags fiskegarn.

Dette er den same forma for organisering som ein ser i choanocyttcellene ein finn i svampar. Særleg tydeleg er likskapen i somme koloniale former. Dette har ført til at dei fleste biologar einast om at svampane stammar frå krageflagellatane, bortsett frå somme som trur det er omvendt - at krageflagellatane er sterkt reduserte svampar. DNA-analysar tyder på den første hypotesen.

Kjelder

• Brusca & Brusca: Invertebrates Sinauer 2002
• Hogg, Stuart: Essential Microbiology Wiley, 2005