Lily Allen

Lily Rose Beatrice Allen (fødd 2. mai 1985 i Hammersmith i London) er ein engelsk artist og skodespelar. Ho er dotter av skodespelaren, komikaren og musikaren Keith Allen og filmprodusenten Alison Owen. Ho har ei eldre søster, Sarah, ein bror, skodespelar Alfie Allen (som ho syng om i songen «Alfie») og fleire halvsøsken.

Lily Allen
Fødd	2. mai 1985 (40 år)
Fødestad	Hammersmith
Fødenamn	Lily Rose Beatrice Allen
Opphav	Storbritannia
Aktiv	2002–
Sjanger	pop, grime, synthpop, indiepop, ska, moderne R&B
Instrument	vokal
Stemmetype	sopran
Plateselskap	London Records, Capitol Records, Regal Recordings, Warner Bros. Records, Parlophone, EMI
Verka som	songar-låtskrivar, skodespelar, filmskodespelar, programleiar, arrangementvert, plateartist
Mor	Alison Owen
Far	Keith Allen
Gift med	David Harbour, Sam Cooper
Prisar	Ivor Novello-prisen, Ivor Novello-prisen

Lily Allen på scena ved Southside Festival 2014 i Neuhausen.

Liv og virke

Bakgrunn

Allen vart fødd i London, men flytta mykje og gjekk på 13 ulike skular i løpet av oppveksten og vart utvist frå mange av dei. Som 15-åring slutta ho på skulen. Ho har fortalt at sjølv i tidleg alder hadde ho problem med autoritetar og at musikken vart eit opprør for henne, men også ein måte å uttrykkja kjensler på.

Musikar

På ferie på Ibiza møtte ho Georg Lamb frå plateselskapet A&R, som introduserte henne for musikkprodusenten Futur Cut. Han har skrive mange av Lilys melodiar. Lily er kjend for å uttala seg skarpt om andre artistar, mellom anna Kylie Minogue, Bob Geldof og Madonna. Ho har vorte kåra til UKs 3. «coolest person», men også den 10. «Most Annoying Person of 2006».

Musikken

Lily Allen har budd i fleire område av London, og dette har påverka musikkstilen hennar. I 2005 signerte ho kontrakt med Regal Records (EMI). Ho lasta opp songane sine på MySpace i november 2005, og fekk mykje omtale då sida hennar vart mykje besøkt. Dette enda med demoen «LDN» som vart Allens første singel. Debutalbumet hennar Alright, Still kom ut i 2006.

Allen har også ein parodi av 50 cents «Window shopper» på MySpace og som ho har spelt på konsertar. Allen er også med som bakgrunnssongar på Robbie Williams si plate Rudebox frå 2006.

Songtekstane hennar er kjende for å ta opp litt uvanlege tema og bruke sterke ord. Songen The Fear er til dømes ein kritikk av fokuset på konsum, utsjånad og berømtheit, mens Fuck You gjer narr av dei som promoterer homofobi og rasisme.

Skodespelar

Allen har spelt i filmane Elizabeth (1998), How to Build a Girl (2019) og TV-serien Dreamland (2023).

Frå 2021 har ho også hatt fleire roller på scena, mellom anna hovudrolla i skodespelet 2:22 A Ghost Story, som ho fekk gode kritikkar for.