Møkster

60°03′57″N 05°05′38″E

Møkster
øy
Land	Noreg
Fylke	Vestland
Kommune	Austevoll kommune
Høgaste punkt	36 moh.
Areal	1,39 km²
Folketal	33
Folketettleik	31 / km²
Møkster 60.06666667°N 5.08333333°E / 60.06666667; 5.08333333
Wikimedia Commons: Møkster

Møkster er ei øy i Austevoll i Vestland fylke. Øya har 33 innbyggjarar (2025).

Her er det moderne matbutikk som er open heile året og Møkster restaurant som er open om sommaren og med catering heile året. Knutaløo har sommarkafe og museum.

Det finst fleire gode hamner, gjestebrygge for fritidsbåtar og gjestebrygge for dei som vitjar butikk og restaurant.

Øya har ikkje brusamband eller bilferje. Snøggbåt går sørover til Bekkjarvik og nordover til Hufthamar, Flesland og Bergen. Reisetid frå Bergen er litt over ein time.

Møkster har flotte turområde med godt merka turstiar ut mot storhavet. Geopark Sunnhordland er ein spektakulær lokalitet.

Historie

Møkster har vore busett iallfall sidan mellomalderen, då det òg vart bygd ei kyrkje, truleg ei stavkyrkje her. Denne kyrkja vart riven og erstatta av ein ny bygning i 1686. Denne vart i sin tur riven i 1892 og soknekyrkja vart flytta til Stolmen. Eit nytt kapell vart oppført i 1983.

På Bergen Museum finst det ein matkniv som er laga av lys grå flint. Kniven stammar frå slutten av yngre steinalderen eller tidleg i bronsealderen. Kniven vart funnen i Karidalen på Møkster.^[1] Det er òg funn av ein flintdolk som går tilbake til eldre bronsealder.^[2]

Folketalsutvikling:

1900[3]	2000[4]	2023[4]
84	65	43