Mønster

Mønster er noko som kan gjentakast eller blir gjenteke etter visse reglar, og kan visa til bilde, lyd, handlingar og modellar av ulike slag. Mønster finst mellom anna i naturen og i matematikken, og blir laga bevisst av menneske i formgjeving og anna kunst. Å finna mønster i hendingar kan også vera med på å løysa problem.

Stare med mønster av spettar og v-ar.

Foto: Paul Lomax

Ordet «mønster» kjem av mellomalderlatin monstra, 'prøvestykke', frå latin monstrare, 'visa fram'. Konkret kan ordet visa til noko som kan brukast til å laga ein slags kopi av noko, til dømes eit hekle-, strikke- eller symønster. Ved å snakka om «mønster» kan ein også visa til uttrykket ein får når noko blir gjenteke fleire gonger, til dømes stripe- eller rutemønster.

Sjå òg

• Mal
• Sjablong
• Mønster i naturen