Pænda

Gabriella Horn (fødd 25. januar 1988^[1]), best kjend under artistnamnet Pænda (òg skrive PÆNDA og Paenda), er ein austerriksk låtskrivar og elektropop-artist. Ho representerte Austerrike i Eurovision Song Contest 2019 i Tel Aviv i Israel med songen «Limits».^[2][3]

Pænda
Fødd	25. januar 1988 (37 år)
Fødestad	Deutschlandsberg
Fødenamn	Gabriela Horn
Alias	Pænda
Opphav	Austerrike
Aktiv	2016–
Sjanger	pop, synthpop
Instrument	vokal
Plateselskap	Wohnzimmer
Verka som	songar, låtskrivar, produsent

Bakgrunn

Horn vaks opp i byen Deutschlandsberg i delstaten Steiermark i Austerrike. Som seksåring byrja ho å synga i kor, og som 14-åring skreiv ho dei fyrste songane sine.^[4][5] Ho lærte òg å spela gitar og piano, og ho drog til hovudstaden Wien som 20-åring. Der studerte ho jazz og pop ved Vienna Music Institute og vart uteksaminert i 2013.^[6]

Pænda bur no i Ottakring, der ho komponerer musikk, skriv tekstar og melodiar.^[5] Ved konsertar får ho instrument- og vokalstøtte av systera si og ei venninne.^[7] Ved sida av musikkarrieren jobbar ho òg som songlærar innan popsjangeren ved ein musikkskole i Leobersdorf.^[4][8][6] I 2015 deltok ho i den tyske reality-TV-serien Popstars.^[9]

Pænda representerte Austerrike i Eurovision Song Contest i Tel Aviv i mai 2019 med songen «Limits».^[10][11][12]

Diskografi

Singlar

• 2017: «Waves»
• 2018: «Good Girl»
• 2018: «Paper-thin»
• 2019: «Limits»

Album

• 2018: Evolution I
• 2019: Evolution II