Partisipp

Partisipp er ei samnemning for infinitte verbformer med adjektiviske eigenskapar. På norsk har verbet to ulike partisipp, som desse formene av verbet syngje:

• presens partisipp: syngjande
• perfektum partisipp: sunge

Ordet partisipp kjem av latin participium, av particeps 'som tek del i', det vil seie i funksjonane både til nomenet og til verbet. Eit særkjenne ved partisippa er nettopp at dei blir bøygde i både nominale og verbale grammatiske kategoriar. På moderne norsk blir perfektum partisipp bøygt i mange av dei same kategoriane som adjektivet:

• ein sungen / liten song
• ei sungen~sunga~sungi / lita~liti vise
• eit sunge / lite vers
• sungne / små songar
• den sungne / vesle songen