Sølvsilda

Sølvsilda var ei norsk utmerking til fiskefartøy som hadde størst totalfangst under vintersildfisket. Første sølvsilda vart utdelt i 1958 og den siste i 1971.

Sølvsilda vart utdelt av Eriksens Oljeklædefabrik i Ålesund. Sølvsilda vart overlevert ved ei tilstelling etter vintersildfisket, der mannskap, folk frå reiarlaget, representantar frå fiskeriorganisasjonane og pressa var til stades. Reiarlaget fekk ei storsild i ekte sølv og i naturtru storleik, montert på ei plate. Kvar av mannskapet fekk eit sølvfat med inngravert sild. Det var stor prestisje i å vinne sølvsilda, og i vintersild-distrikta var engasjementet stort. I tre år på rad fekk Torrison-reiarlaget i Meløyvær sølvsilda: «Ole Torrisen» i 1964, og «Torris» i 1965 og 1966.

Det vart utdelt sølvsild til beste snurpar, som fiska med snurpenot. Nokre år fekk beste drivar, som fiska med drivgarn, sølvsild, og eitt år vart sølvsild utdelt til beste trålar.

Vinnarar av sølvsilda

År	Type fartøy	Fiskefartøy	Registrerings nr.	Total fangst
1958	Snurpar	«Langvin»	M – 250 - A	8 771 hl
1959	Snurpar	«Fisk»	M – 105 - H	18  365 hl
1959	Driver	«Nybo»	M – 56 - SA	4 294 hl
1960	Snurpar	«Veslegut»	M – 27 - BS	10 776 hl
1960	Drivar	«Yngvar»	F – 72 - V	2 515 hl
1961	Snurpar	«Ligrunn»	H – 453 - F	5 500 hl
1962	Snurpar	«Staaløy»	H – 38 - AV	4 224 hl
1962	Drivar	«Verning»	SF – 27 - B	1 177 hl
1963	Snurpar	«Sigerfjord»	N – 153 - SO	4 032 hl
1963	Drivar	«Strand Senior»	M – 25 - H	955 hl
1964	Snurpar	«Ole Torrissen»	N – 540 - ME	20 286 hl
1965	Snurpar	«Torris»	N – 155 - ME
1965	Drivar	«Vikavåg»	M – 2 - F	1 147 hl
1966	Snurpar	«Torris»	N – 155 - ME	36 139 hl
1966	Drivar	«Soløyvåg»	M – 80 - F	1 660 hl
1967	Snurpar	«Radek»	H – 12 - A	26 600 hl
1967	Trålar	«Ponny»	VA – 94 - K	2 364 hl
1968	Snurpar	«Uksnøy»	M – 175 – SØ	6 495 hl
1969	Snurpar	«Ny-Eros»	M – 39 - HØ	7 640 hl
1970	Snurpar	«Artus»	M – 79 - HØ	5 625 hl
1971	Snurpar	«Tornado»	M – 18 - AK	3 171 hl

Kjelder

• Per Helge Pedersen og Åge Olsen: Havets sølv Kystens gull . Kristiansund – den siste store sildebyen i Norge. Per Helge Pedersen ENK 2022 ISBN 978-82-692255-1-8
• Norvald Kjerstad: FISKERFOLKET Illustret fiskeri- og fartøyhistoreie fra Lepsøya (1870 – 2013) Kjerby AS og Lepsøy Bygdearkiv 2013. ISBN 978-82-998466-1-5