Orfèu
From Wikipedia, the free encyclopedia
Orfèu (en grèc ancian Ὀρφεύς) es un eròi de la mitologia grèga, filh del rei de Tràcia Eagre[1] e de la Musa Calliòp. Poèta e musician, èra a vegada considerat coma un profèta e inspirèt un movement religiós nomenat « orfisme », qu'èra ligat als pitagoricians e als mistèris dionisiacs[2]. Orfèu èra dels Argonautas; sa davalada als Infèrns e son fracàs a tornar sa femna Euridice dins lo mond dels vivents forman son mite.
Gaireben totes los autors antics s'acòrdan sus l'existéncia istorica d'Orfèu[3], per Aristòtel, Orfèu jamai foguèt poèta. Segon el, l’autor dels imnes orfics se nomena Cercòps[4],[5]. Orfèu es evocat dins un poèma d'Ibicos, al sègle VII[6]. La legenda d'Orfèu es ligada a la religion dels mistèris e a una literatura sagrada; ensenha las iniciacions, e a s'abstenir dels murtres per l'instauracion de las expiacions[7].