Cercle d'Afrairament Occitanocatalan

Cercle d'Afrairament Occitanocatalan


Donadas
Tipe	organizacion
Ideologia	Occitanisme

Istòria
Fondacion	1977


Site web	caoc.cat

Fondat oficialament en 1978, lo CAOC contunha l’activitat de l’Oficina de Relacions Meridionals, creada en 1928 per Josep Carbonell i Gener e suprimida pendent la dictadura franquista. Aquela oficina, ligada a la Generalitat de Catalonha, aviá per mission de manténer los ligams culturals e lingüistics amb Occitània e de promòure la cultura occitana dins lo territòri catalan.^[1] Lo CAOC foguèt creat amb la volontat de tornar lançar aquel projècte de retrobament entre las culturas catalana e occitana, e de las far conéisser mutualament dins lors espacis respectius.

L’impulsion iniciala per la creacion del CAOC venguèt d’una iniciativa de Josep Maria Batista i Roca, amb la collaboracion d’Enric Garriga Trullols e de Joan Amorós Pla. L’11 de julhet de 1977 foguèt decidit de bastir un nòu agermanament occitanocatalan. Una Crida Occitano-Catalana foguèt presentada a Vilanova i la Geltrú lo 20 de novembre de 1977, dins l’encastre del Congrès de Cultura Catalana, amb la preséncia remarcabla del meteis Josep Carbonell i Gener, qu’i foguèt omenatjat.

La primièra assemblada constituenta del CAOC aguèt luòc als Edificis Trade de Barcelona lo 21 de genièr de 1978, jos la presidéncia de Josep Maria Batista i Roca. L’11 de febrièr seguissent se tenguèt la primièra reünion conjunta entre las seccions catalana e occitana a l’Universitat de Perpinyà (Catalonha).

Los estatuts del CAOC, que delimitavan l’airal d’accion a totes los territòris de lenga catalana e que fixavan lo catalan e l’occitan coma lengas exclusivas de l’associacion, foguèron aprovats per l’Estat espanhòl lo 19 de junh de 1979 e signats per Joan Amorós Pla, alara president de l’entitat.

Lo CAOC possedís de sètis a Barcelona e a Tolosa. Dempuèi l’annada academica 2008–2009, amb lo sosten de la Direccion Generala de Politica Lingüistica de la Generalitat de Catalonha, organiza de corses d’occitan (nivèls A1, A2, B1, B2 e C1), a mai de talhièrs de conversacion, fonetica, literatura e d’autras expressions de la lenga e de la cultura occitanas.^[2]^[3]

Cada an organiza d’eveniments conjunts coma lo Prèmi Rei En Pere e los Fòcs de Sant Joan al Castèl de Montsegur, amb lo sosten del Centre d’Estudis Catars de Renat Nelli, fondat en 1982.^[1]

Dins lo domeni institucional, la seccion occitana aguèt coma primièr president l’istorian (fr) Pèire Vilar (article en francés), seguit per l’escrivan e activista Robèrt Lafont. Lo primièr secretari ne foguèt Pèire Lagarda. Dins la seccion catalana, una figura clau foguèt Enric Garriga i Trullols, e dins la seccion occitana, mai recentament, lo provençal Pèire Pessamessa.

Dempuèi 1978, lo CAOC trabalha a la promocion de la cultura occitanocatalana dins un espaci geografic que va dels Alps e del Massís Central fins a Guardamar, e de l’Atlantic gascon fins al Piemont, Sardenha e Sicília. Malgrat las dificultats logisticas e la manca d’interés politic dins cèrts periòdes, mantenguèt un trabalh constant de difusion de la realitat occitana en Catalonha e del fach catalan en Occitània. Aquela accion es considerada coma una partida importanta de la projeccion exteriora de Catalonha, tant sul plan cultural coma toristic e economic.

Un dels eveniments mai emblematics es la Pojada al Pòrt de Salau, que se celebra dempuèi mai de vint-e-uèch ans cada annada a Esterri d'Àneu, per restablir los ligams istorics entre los dos territòris.^[4]

Lo CAOC foguèt reconegut coma Associacion d’Interès Cultural per la Generalitat de Catalonha lo 23 d’octòbre de 1997.^[5]

Cercle d'Afrairament Occitanocatalan

Istòria

Presidents de la seccion occitana del CAOC

Presidents del CAOC

Ligames extèrnes

Wikiwand - on