Centre Espaciau Kennedy

Lo Centre Espaciau Kennedy (« John F. Kennedy Space Center ») es un complèxe de lançament espaciau fondat en 1959 e gerit per la NASA. Se situa sus la còsta orientala de Florida, a proximitat de la basa de lançament de Cap Canaveral qu'es sota lo contraròtle de l'armada estatsunidenca. Per aquela rason, lei doas basas son sovent confondudas. Lo centre Kenndy aguèt un ròtle centrau dins mai d'un programa major de la NASA coma lo programa Apollo, lo programa de la naveta espaciala estatsunidenca e, pus recentament, lo programa Space Launch System.

Installacions

Lo centre es utilizat per realizar de tirs vèrs l'èst, en direccion de l'ocean, per beneficiar de l'efiech de fonda de la Tèrra e per redurre lei riscs de tombada d'objèctes sus de populacions. De zònas son partejadas amb la basa de lançament de Cap Canaveral. Leis installacions principalas comprènon dos complèxes de lançament. Lo pus important es lo complèxe de lançament 39 qu'es una zòna d'assemblatge e de tirs d'engenhs pesucs coma la Saturn V, la naveta espaciala e la Falcon 9. La màger part deis installacions pus famosas de la NASA se situan dins aquela zòna coma lo Vehicle Assembly Building (« Bastiment d'assemblatge dei veïculs ») ò lo Launch Control Center (« sala de contraròtle a l'enaurament »). La segonda installacion majora es lo complèxe de lançament 48 qu'es dedicat ai lançaires leugiers. En mai d'aquò, lo centre tèn d'infrastructuras dedicadas a l'administracion, a l'entraïnament, ai fòrças de seguretat dau site e ai visitas toristicas.

• 
  Complèxe de lançament 39
• 
  Lo Vehicle Assembly Building en 2005
• 
  Sala de contraròtle n° 1 dau Launch Control Center
• 
  Sala de contraròtle n° 2 dau Launch Control Center
• 
  Complèxe de lançament 48
• 
  Installacion d'entraïnament per leis astronautas destinadas a trabalhar dins l'ISS