Clamença Isaura

Clamença Isaura es un personatge mitic de l'Edat Mejana del país tolosan. La legenda ditz que creèt los Jòcs Florals a Tolosa e venguèt aital una figura emblematica per fòrça poètas coma Pèire Godolin.

Clamença Isaura, pintura de Jules Joseph Lefebvre (1836-1911)

Biografia

Se pensa actualament que Clamença Isaura existiguèt pas jamai, que foguèt un personatge inventat per ajudar a la creacion de l'Acadèmia dels Jòcs Florals en ne far una mena de protectora e mecènas d'aquela institucion. Aquela dòna sortida d'una de las mai grandas familhas de la noblesa lengadociana, sens marit ni mai enfants, seriá mòrta cap a 1500 quand aviá 50 ans. Lo nom Isaura apareguèt pel primièr còp en 1549 dins una ballada premiada als Jòcs Florals. Son còs seriá estat enterrat en 1557 jos l'autar de Maria, dins la basilica de la Daurada de Tolosa.

Eiretatge de Clamença Isaura

Clamença Isaura, escultura d'Antoine Augustin Préault. Jardin du Luxembourg (París, França)

Dòna Clamença venguèt lo personatge emblematic e central dels jòcs florals. E tre 1527, lo 3 de mai se fasiá cada an son elògi public. Mai tard la figura de Clamença Isaura, a mai foguèsse sonque una legenda, inspirèt fòrça artistas : de poètas, d'escrivans e mai tanben de pintres e d'escultors. Divèrses endreches e bastiments de l'airal tolosan pòrtan lo nom d'aquela dòna illustra.

Vejatz tanben

• Acadèmia dels Jòcs Florals

Suls autres projèctes Wikimèdia :

• Clamença Isaura, sus Wikimedia Commons