Dialècte

En lingüistica, un dialècte^[1] (del latin dialectus eissit del grèc ancian διαλέγω, dialégô significant «conversar») es la varietat d'una lenga, associada a un airal geografic determinat.^[2] Un dialècte se pòt devesir en sosdialèctes, e aqueles darrièrs pòdon tenir d'autras divisions fins a aténher l'estadi local de l'idiolècte (parlar).

Taxonomia

Un dialècte es un idiòma avent de caracteristicas lexicalas e foneticas netas formant un continú lingüistic egalament nomenat lenga. Se qualifica de lenga generalament una nòrma escricha, estandarda e pluridialectala. Per exemple, lo neerlandés estandard es una nòrma escricha de lenga bas-francica eissida de las varietats dialectalas del flamenc e de l'olandés.