El Príncipe Gitano

Enrique Castellón Vargas, mai conegut coma El Príncipe Gitano (en occitan : Lo Prince Gitano), nascut a Valéncia lo 7 d'abril de 1928 e mòrt en Espanha del COVID-19 a Mandayona lo 22 d'abril de 2020, foguèt un dançaire, cantaire de flamenco e actor espanhòu.

Enrique Castellón Vargas es eissit d'una familha gitana catalana del barri de La Bordeta a Barcelona, Gitanos que vivián de la venda ambulanta e del comerci de bestial. Èra lo fraire de la cantaira catalana de flamenco e de rumba Dolores Vargas (1936–2016). Faguèt una carrièra artistica a Madrid (Espanha). Aital, a 14 ans, debutèt al teatre a Madrid dins lo meteis espectacle que Lola Flores. Venguèt en seguida una figura importanta de la cançon espanhòla dins las annadas 1950, quitament se sa passion vertadièra èra la tauromaquia, ambe la quala aguèt pas lo meteis succès. Foguèt tanben un actor popular al cinèma en Espanha dins las annadas 1950 e 1960.

Coma cantaire, èra conegut per aver interpretat Obí, obá e una represa en espanhòu de In the Ghetto d'Elvis Presley. Obí, Obá, cada día te quiero más es una cançon tirada del folclòre gitano, qu'inspirèt tanben a la fin de las annadas 1980 lo Djobi, Djoba dels Gipsy Kings.

Es el que cantèt tanben El Porompompero en 1962, una rumba compausada en 1960 per Juan Solano Pedrero (paraulas de José Antonio Ochaíta e Xandro Valerio), jà cantada per Manolo Escobar tre 1961 ; pasmens, foguèt sa version que contribuèt lo primièr a popularizar internacionalament aquesta cançon tre las annadas 1960, tant que retrospectivament se considèra El Porompompero coma essent una cançon del Príncipe Gitano, vist que de tot biais, e quitament se Manolo Escobar foguèt lo primièr de la cantar, sos autors la destinavan al Príncipe Gitano. Pasmens, El Porompompero foguèt tornamai un succès internacional dins las annadas 1970 aqueste còp ambe una novèla version de Manolo Escobar.