Enkidu

Enkidu es un personatge legendari de la Mesopotamia anciana. Rivau e amic de l'eròi Gilgamesh, es un personatge centrau de l’Epopèia de Gilgamesh.

Representacion probabla d'Enkidu dins un palais dau rei assirian Sargon II.

Biografia

Creat per la divessa Aruru a partir d'un tròc de glaisa de l'estepa, ignora inicialament la civilizacion e son comportament es aqueu d'un animau. Es convertit a la civilizacion per una cortesana, Shamhat. Après un combat indecís, ven l'amic de Gilgamesh e l'acompanha dins la Selva dels Cedres per i combatre lo demòni Humbaba. L'expedicion es un succès, mas a son retorn, Gilgamesh ofensa la divessa Ishtar que manda un taur gigant còntra la vila d'Uruk. Los dos amics tuan la creatura e Enkidu li arrancha una chamba e la gita a Ishtar en la menaçant. Es alora condamnat a una mòrt precòça per los dieus.

Tochat per una malautiá incurabla, Enkidu mauditz Shamhat. Totun, la cortesana e Gilgamesh li rampelan los moments de plaser e d'amistat. Enkidu accèpta alora de levar sas malediccions. Mòre après un songe terrible sus la condicion dels defuntats dins los inferns. Aquela disparicion inicia la seguia de l'epopèia e lo començament de la quista de l'immortalitat de Gilgamesh.