Frank R. Hamlin

Frank Rodway Hamlin (Wolverhampton, Anglatèrra, 10 d'abril 1935 - Richmond, Canadà, 23 de febrièr de 2000) foguèt un ensenhaire e lingüista anglés (que viviá en Canadà). Professor a l'Universitat de Colombia Britanica, era especialista en onomastica e tanben en filologia romanica, mai especializat en occitan e francés ancian. Estudièt la toponimia occitana, pus precisament los noms de lòc lengadocians. Sa contribucion màger en aqueste domeni foguèt Les noms de lieux du département de l'Hérault : Nouveau Dictionnaire Topographique et Étymologique que farguèt amb la collaboracion de l'abat Andrieu Cabròl. Escriguèt fòrça articles per de revistas prestigiosas coma Names, la Revue des langues romanes, la Revue internationale d'onomastique e Onomastica Canadiana.

Biografia

Hamlin venguèt professor de francés a l'Universitat de Colómbia Britanica en 1963 aprèp d'estudis a l'Universitat de Birmingham e puèi al Caius College de Cambridge ont obtenguèt son doctorat. En 1957-58, del temps de son trabalh a Montpelhièr coma lector d'anglés, coneguèt l'universitari occitanista Carles Camprós, e atal preparèt jos sa direccion una tèsi sul sufix -acum dins la toponimia del pas d'Erau, que sostenguèt a Birmingham en 1959.

Estudièt detalhadament la toponimia del país d'Erau e publiquèt fòrça libres sus aqueste sicut. Se ganhèt lo prèmi Albèrt Dauzat en 1982 e foguèt fait Chevalier dins l'Òrdre de las arts e de las letras del Ministèri francés de la Cultura e Comunicacion en 1998. Ocupèt la carga d'editor de la revista Onomastica Canadiana, de 1988 a 1994. Aprèp la siá mòrt, sa femna leguèt sa bibliotèca a l'Universitat Simon Fraser.

Bibliografia

• Le suffixe -acum dans la toponymie de l'Hérault : contribution à l'étude des noms de lieux du Languedoc, 1959.
• amb John Hathaway e Peter T. Ricketts: Introduction à l'étude de l'ancien provençal, 1967.
• Les Noms de lieux du département de l'Hérault, 1983.
• amb Crestian Camps: Cartulaire de Gellone : table des noms de personnes et des noms de lieux, 1994.
• Toponymie de l'Hérault, 2000.