Ligue Nationale de Hockey

La Liga Nacionala de Òquei o LNH (en françés : Ligue Nationale de Hockey) es una associacion esportiva professionala nòrd-americana regropant de franquesas de òquei sus glaç de Canadà e dels Estats Units. Lo nivèl de jòc d'aquela liga es considerat coma lo melhor al mond. Los jogaires que la compausan son longtemps estadas en granda majoritat d'origina canadiana puèi nòrd-americana. A mesura, de novèlas nacionalitats de jogaires se son ajustadas a la lista e, e mai se los canadians demòran los mai nombroses, mantun país son d'ara enlà representats.

Aicí, la copa expausada al public.

La LNH opèra annalament de setembre a junh pendent doas fasas distintas : la sason regulara pendent la quala totas las equipas s'encontran puèi una fasa de serias eliminatòrias entre las formacions melhoras de la primièra fasa. Una seria entre doas equipas se jòga pendent mantuna partida e la finala de las serias vei l'atribucion al venceire de la Copa Stanley, un dels mai ancians trofèus d'espòrts collectius al mond.

La Liga nacionala de òquei es creada lo 26 de novembre de 1917 après un rencontre entre los representants de l'Associacion nacionala de hòquei a l'ostalariá Winson de Montreal. Los proprietaris dels Canadians de Montreal, Wanderers de Montreal, Senators d'Ottawa, Bulldogs de Quebèc e Arenas de Toronto decidisson de crear una liga novèla per tal d'exclure Edward Livingstone, proprietari dels Blueshirts de Toronto. Pendent sas 25 primièras annadas, la LNH compta un nombre variable d'equipas anant fins a amassar 10 equipas entre 1926 e 1931. La Depression Granda de 1929 aflaquís las finanças de las franquesas de la LNH que s'arrèstan las unas après los autres. Fin finala, en 1942, demòra pas mai que sièis equipas e se partegen la Copa Stanley pendent las 25 sasons que seguisson. Dempuèi 1967, la LNH es regularament en expansion e compta 30 franquesas diferentas de la sason 2000-2001 a la sason 2016-2017. En 2017-2018, aculhís una 24na franquesa etatsunidenca, contra 7 canadianas, après la creacion d'una equipa a Las Vegas, dont l'efectiu es constituït gràcias a una repesca d'expansion organizat en 2017. Un procediment que serà identic per Seattle, dont la franquesa es aprovada per la LNH lo 4 de decembre de 2018.

Estructura

La Liga nacionala de òquei es una associacion esportiva professionala nòrd-americana qu'amassa de franquesas de hòquei sus glaç de Canadà e dels Estats Units. La LNH organiza annalament una competicion de hòquei sus glaç entre sas diferentas franquesas que son al nombre de 32 dempuèi la sason 2021-2022. La competicion se descompausa en doas partidas : una sason regulara generalament d'octobre a abril e puèi de las serias eliminatòrias entre abril e junh.